დღეს, 28 ნოემბერს, კოალიცია ძლიერი საქართველოს ლიდერები საქართველოს პრეზიდენტ, სალომე ზურაბიშვილის ორბელიანების სასახლეში შეხვდნენ.

კოალიციის ერთ-ერთი ლიდერი, მამუკა ხაზარაძემ ჟურნალისტებთან საუბრისას კომენტარი გააკეთა პრეზიდენტობის კანდიდატად მიხეილ ყაველაშვილის დასახელებაზე და თქვა, რომ "ახალი პრეზიდენტი ისევე არალეგიტიმურია, როგორც საქართველოს პარლამენტი".

"ჩვენ გვჭირდება ერთობა, ეს არის ძალიან მნიშვნელოვანი — ჩვენ გვჭირდება ერთობა ოპოზიციურ მხარეს და ასევე, ჩვენ გვჭირდება იმ მანდატების დაცვა, რომელიც ოპოზიციურ პარტიებს მისცა ჩვენმა მოქალაქეებმა

როგორც ხედავთ, ქართული ოცნება აგრძელებს თავის სპეცოპერაციას — ამას ჩვენ შევეწინააღმდეგებით და უამრავი გეგმა გვაქვს, როგორ გავაკეთოთ ეს

რაც შეეხება ახალ პრეზიდენტ, ის ისევე არალეგიტიმურია, როგორც საქართველოს პარლამენტი", — თქვა ხაზარაძემ.

როგორც ძლიერი საქართველოს ერთ-ერთი ლიდერი, ბადრი ჯაფარიძე ამბობს, პრეზიდენტი "შემდეგი ნაბიჯების შესახებ" კოალიციასთან ერთად მსჯელობს და ზურაბიშვილის შეუძლია "გამაერთიანებლის" როლი ითამაშოს.

"ჩვენი შეხვედრები ყოველთვის ეხება ჩვენს ერთობას, მე ვგულისხმობ საზოგადოების გამთლიანებას - იმას, თუ როგორ მშვიდობიანად გავუწიოთ წინააღმდეგობა იმ უმსგავსობას, რომელსაც ქართული ოცნება სჩადის.

აი, ამაზე ვსაუბრობთ და ძალიან მნიშვნელოვანი არის ნებისმიერ წამოწყებაში პრეზიდენტი ზურაბიშვილის მონაწილეობა.

პირდაპირ გეტყვით, მე ვხედავ მის [სალომე ზურაბიშვილის] როლს, როგორც გამაერთიანებლის როლს, ყოველგვარი გადაჭარბების გარეშე - მას შეუძლია ითამაშოს გამაერთიანებლის როლი და პრეზიდენტი ზურაბიშვილი მსჯელობს ჩვენთან ერთად რა შეიძლება იყოს შემდეგი ნაბიჯები.

ის ფიქრობს თავის გეგმებზე, ამიტომ მნიშვნელოვანია ასეთი შეხვედრები პრეზიდენტ ზურაბიშვილთან", — თქვა ჯაფარიძემ