2025 წლის ევროვიზიამდე ჯერ კიდევ რამდენიმე თვე გვაშორებს, მაგრამ მასპინძელ შვეიცარიაში კონკურსისთვის უკვე მზადებაა დაწყებული. ამ სამზადისს დაბრკოლება მაშინ შეექმნა, როცა ულტრამემარჯვენე პარტიამ, შვეიცარიის ფედერალურ-დემოკრატიულმა გაერთიანებამ (EDU), მოითხოვა, ევროფესტივალის ორგანიზებისთვის ბიუჯეტიდან თანხის გამოყოფის საკითხი მასპინძელი ქალაქის მოსახლეობას რეფერენდუმით გადაეწყვიტა. რეფერენდუმში კი ქალაქ ბაზელის მოსახლეობის 67%-მა მხარი დაუჭირა ევროვიზიის დაფინანსებას 35 მილიონი შვეიცარიული ფრანკით (დაახლოებით, 108 მილიონი ლარით).

EDU-ის განცხადებით, ევროვიზიის მასპინძლობა ბაზელს "რეპუტაციას შეულახავს". საკრებულოს წევრმა ფილიპ კარუბიმ კონკურსი "მკრეხელური პერფორმანსების" გამო გააკრიტიკა და აღნიშნა, რომ ევროვიზია ისეთი "იდეოლოგიების პოპულარიზების იარაღად იქცა", როგორებიცაა "ვოუქიზმი" და "ტრანსგენდერთა უფლებები". პარტიას ამის მაგალითად 2024 წლის ირლანდიელი კონკურსანტი მოჰყავს, რომლის პერფორმანსსაც EDU "ოკულტისტურს" და "სატანისტურს" უწოდებს.

თუმცა, როგორც ჩანს, ფედერალურ-დემოკრატიულ გაერთიანებას ბაზელის მოსახლეობის უმრავლესობა არ ეთანხმება, ასე რომ, ევროვიზია 2025-ისთვის შვეიცარიაში სამზადისი გრძელდება.

შვეიცარიამ მომავალი წლის ევროფესტივალის მასპინძლობის უფლება მაისში, რიგით 68-ე ევროვიზიის სიმღერის კონკურსზე გამარჯვებით მოიპოვა. ქვეყანას კონკურსზე მესამე გამარჯვება 24 წლის ნემო მეტლერმა, სიმღერით The Code მოუტანა. ნემო ევროვიზიის ისტორიაში პირველი ღიად არაბინარული გენდერული იდენტობის მქონე გამარჯვებულია.

რაც შეეხება 2025 წლის ევროვიზიას, მას ბაზელი 13, 15 და 17 მაისს უმასპინძლებს. კონკურსზე მონაწილეობის სურვილი ამ დრომდე 38-მა ქვეყანამ გამოთქვა, მათ შორის, საქართველომ.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...