დღეს, საქართველოს პრემიერმინისტრმა, ირაკლი კობახიძემ გერმანიის ელჩ პეტერ ფიშერთან დაკავშირებით განაცხადა, რომ "საქართველოში გერმანიას ელჩი არ ჰყავს".

"გერმანიის ელჩისთვის გაწვევა იქნებოდა ძალიან დიდი პატივი, აქედან გამომდინარე, მე არ მგონია, რომ ასეთი გადაწყვეტილება უნდა მივიღოთ. რეალურად საქართველოში გერმანიას ელჩი დღეს არ ჰყავს, ეს არის ყველაზე სწორი სტატუსი, რაც ე.წ. ელჩს შეეფერება დღეს საქართველოში", — განაცხადა ირაკლი კობახიძემ.

ამასთან, ფიშერთან დაკავშირებით განცხადება ირაკლი ზარქუამაც გააკეთა, რომელმაც მიმართა საგარეო საქმეთა სამინისტროს, რომ "დაინტერესდნენ ამ პერსონით".

შეგახსენებთ, გუშინ, ფიშერმა საქართველოს ევროკავშირში გაწევრიანების პერსპექტივაზე ისაუბრა და გაიმეორა, რომ პროცესი შეჩერებულია.

ამას გარდა, მან დასძინა, რომ საქართველოს მთავრობა უარყოფს პროცესის შეჩერებას თუმცა, როგორც აღნიშნა: "ჩვენ ვწყვეტთ რა არის შეჩერებული და რა არა, ამას კანდიდატი არ წყვეტს, ასე რომ, შეჩერებულია"

მისივე თქმით, საქართველოს მომავალი ევროკავშირში ახლა კითხვის ნიშნის ქვეშ დგას.