კოლექტიური თავდაცვის ხელშეკრულების ორგანიზაციის (CSTO) ასტანაში გამართულ სამიტზე ვლადიმერ პუტინმა რუსეთის სამხედრო შესაძლებლობებზე ისაუბრა. მისი თქმით, რუსეთი იმაზე ათჯერ მეტ ჭურვსა და რაკეტას აწარმოებს, ვიდრე NATO-ს ქვეყნები ერთად.

ასევე, პუტინის განცხადებით, ცოტა ხნის წინ პირველად გამოყენებულ "ორეშნიკის" ტიპის რაკეტას ანალოგი დასავლეთში არ აქვს და დიდი ხნის განმავლობაში არ ექნება. ამავე სამიტზე პუტინმა სწორედ "ორეშნიკის" კიევში გადაწყვეტილების მიმღები ორგანოების წინააღმდეგ გამოყენებაზე ისაუბრა.

პუტინის თქმით, რუსეთს "მტრების ქმედებების საპასუხოდ ახალი იარაღის გამოცდა მოუწია" — სავარაუდოდ, აგრესორი ქვეყნის პრეზიდენტი აშშ-ისა და გაერთიანებული სამეფოს მიერ უკრაინისათვის შეიარაღების რუსეთის ტერიტორიაზე გამოყენების უფლების მიცემას გულისხმობდა.

პუტინის თქმით, "ორეშნიკის" მასობრივ გამოყენებას ბირთვული იარაღის გამოყენების ეფექტი ექნება.