Sex Education-ს (სქესობრივი განათლება) მთელი მსოფლიოს მასშტაბით პოპულარობა უმიზეზოდ არ ხვდომია წილად: სერიალი თინეიჯერების ცხოვრების მრავალ ასპექტს გვიჩვენებს, თუმცა შოუ ზრდასრულებისთვისაც რელევანტურია.

სექსუალური განათლების, სექსუალობისა და სხეულში მიმდინარე პროცესების თემები ჯერ კიდევ ტაბუირებულია. უამრავი დამაზიანებელი მითი ხელს გვიშლის, სექსის მიმართ ჯანსაღი დამოკიდებულება ჩამოვიყალიბოთ (მაგალითად ის, რომ კაცები ყოველთვის მზად არიან სექსისთვის, სექსი ყოველთვის მოიცავს პენეტრაციას და ა.შ), სექსუალური განათლება არსებული წარმოდგენების გადააზრებაში გვეხმარება.

ფრთხილად, წინ სპოილერებია! თუ ჯერ კიდევ არ გინახავთ Sex Education-ის (სქესობრივი განათლება) სამივე სეზონი, გაფრთხილებთ, რომ სტატიაში რამდენიმე სპოილერი შეგხვდებათ.

ოტისი და დედამისი

შოუს ერთ-ერთი მთავარი ხაზი თინეიჯერი ოტისის ურთიერთობაა დედამისთან, რომელიც შვილს თავისუფლად ესაუბრება სექსზე, გამოცდილებისა და პრობლემების შესახებ ეკითხება, მაგრამ საუბარს არასდროს აძალებს.

შეიძლება, ოტისისა და ჯინის ურთიერთობა დედაშვილური ურთიერთობის იდეალურ მაგალითად მოგვეჩვენოს: ისინი ხომ ერთმანეთს არაფერს უმალავენ, თუმცა, ეს მოდელი იდეალური სულაც არაა: ოტისსა და ჯინს ნამდვილად აქვთ საზღვრების პრობლემა.

ჯინისთვის პრობლემას არ წარმოადგენს ოტისის ოთახში დაუკითხავად შესვლა და სასურველი ინფორმაციის მოსაპოვებლად მის ნივთებში ქექვა. სხვა სიტყვებით რომ ვთქვათ, ოტისის პირადი სივრცე და საიდუმლოს ქონის უფლება მუდმივად ირღვევა იმ ადამიანის მიერ, რომელსაც ყველაზე მეტად ენდობა.

შესაძლოა, იფიქროთ, რომ ჯინის საქციელი სამართლიანია: ის ცდილობს, საკუთარი შვილი დაიცვას. მაგრამ სინამდვილეში საზღვრების დარღვევა ფსიქოლოგიური ძალადობის ერთ-ერთი სახეა.

ოტისი და მისი პრობლემები

თითქოს, გამოცდილი სექსოლოგის შვილს სექსუალურ განათლებასთან დაკავშირებული პრობლემები არ უნდა ჰქონდეს, თუმცა, სერიალის განმავლობაში ვხედავთ, როგორ უჭირს ოტისს თავის სექსუალურ სურვილებში გარკვევა.

ოტისის პრობლემების დიდი ნაწილი სექსისადმი დედამისის დამოკიდებულებიდან გამომდინარეობს. ჯინი თავს ვალდებულად არ თვლის, ინტიმური ცხოვრება შვილისგან განაცალკევოს. ოტისს ესმის დედამისის მიერ სექსის დროს გამოცემული ხმები და ეს ფაქტი მთლიანად ცვლის მის ურთიერთობას ჯინთან. ეს ის მთავარი ნიშანია, რაც მილბურნების ოჯახს ნებისმიერი სხვა ოჯახისაგან განასხვავებს.

ამასთანავე, ოტისის მშობლები მას შემდეგ დაშორდნენ ერთმანეთს, რაც მამამისმა, რემიმ დედამისს უღალატა. დაშორების შემდეგ რემი ოტისის ცხოვრების ნაწილი აღარ იყო და იშვიათად ელაპარაკებოდა შვილს, რის გამოც ბიჭმა სექსი პრობლემებთან, დაშორებასა და მიტოვების გრძნობასთან გააიგივა.

ფუნდამენტური საკითხია, რომ ბავშვები არ უნდა იყვნენ მშობლების პირადი ცხოვრების ნაწილი. ოჯახის ყველა წევრს აქვს სივრცის ქონის უფლება და შვილისა და მშობლის ურთიერთობაში ამ ხაზის გადაკვეთა არაჯანსაღ ატმოსფეროს ქმნის.

მოზარდობის ასაკში ბევრი ფაქტორი მოქმედებს სექსუალობისა და სექსუალური იდენტობის ჩამოყალიბებაზე. ეს სწორედ ის დროა, როცა ყველაზე კრიტიკულ ასაკობრივ კრიზისს გავდივართ. ნეგატიური წარმოდგენები, სექსუალური განათლების ნაკლებობა და სექსუალურ პრობლემებზე საუბრის უხერხულობა ხელს უწყობს კომპლექსების ჩამოყალიბებას, რომელთაგან გათავისუფლებაც ზრდასრულ ასაკში ძალიან გვიჭირს.

ერიკი და მისი სექსუალური ორიენტაცია

მომდევნო ოჯახის, ეფიონგების პრობლემა ასევე ბევრი ოჯახისთვისაა ნაცნობი: მშობლები, რომელთაც უჭირთ შვილის სექსუალური ორიენტაციის მიღება.

ერიკი გეია და საკუთარ თავს ღიად გამოხატავს, მშობლები კი მოუწოდებენ, გოგოებთან პაემნებზე იაროს. თუმცა ერთი ეპიზოდის შემდეგ ყველაფერი იცვლება. მას შემდეგ, რაც თვალშისაცემი ჩაცმულობის გამო სცემენ, ერიკი საკუთარ თავში იკეტება. სწორედ ამ დროს იაზრებენ მშობლები, რომ მათ შვილს ბედნიერებისთვის საკუთარ თავთან და სამყაროსთან გულწრფელობა სჭირდება.

სკოლის წვეულებამდე ცოტა ხნით ადრე ერიკის მამა აღიარებს, რომ ამაყობს თავისი უშიშარი შვილით. სწორედ ასეთი უპირობო სიყვარული გვიქმნის ადამიანებს დაცულობისა და სტაბილურობის შეგრძნებას.

ეიმი და სექსუალური შევიწროება

UN Women-ის კვლევის მიხედვით, ბრიტანელი ქალების 97%-ს ერთხელ მაინც გამოუცდია სექსუალური შევიწროება. უნდა აღინიშნოს, რომ ტერმინი "შევიწროება" არ მოიაზრებს მხოლოდ იძულებით სექსუალურ აქტს. ის მოიცავს ყველა სახის სექსუალურ ქმედებას, რომელიც ორივე მხარის თანხმობის გარეშე ხორციელდება.

ეიმი გიბსის ისტორია გვაჩვენებს, როგორ შეუძლია სექსუალური შევიწროების ერთ "პატარა" (ხალხის აზრით) შემთხვევასაც კი დააზიანოს ადამიანის ფსიქიკა და მენტალური ჯანმრთელობა. ეიმი იღბლიანი აღმოჩნდა, რომ ჰყავს მეგობრები, რომლებიც პრობლემის დაძლევაში ეხმარებიან.

ოლა და სექსუალური იდენტიფიკაცია

მოზარდობა ის პერიოდია, როდესაც სექსუალობა სრულად მჟღავნდება. ხშირად თინეიჯერები არ არიან დარწმუნებულნი საკუთარ იდენტობაში და საკუთარი თავის გამოსახატად მრავალ როლს ირგებენ.

სექსუალური ორიენტაციის გაგებისა და მიღების გზაზე ხშირად ვაწყდებით წინააღმდეგობებს. ცდისა და შეცდომის მეთოდი, რომელსაც ადამიანები თვითგამოსარკვევად მიმართავენ, ზოგჯერ ძალიან მტკივნეულია, თუმცა ეს ბუნებრივი პროცესია — აი, ეს შეგვიძლია ვისწავლოთ ოლას ისტორიიდან.

ლილი და სექსისადმი დამოკიდებულება

თითოეული ინდივიდის სექსუალური განვითარება უნიკალურია და ხანდხან თინეიჯერები ფიზიკურად უფრო სწრაფად ყალიბდებიან, ვიდრე — ფსიქოლოგიურად.

ლილის ისტორია გვაჩვენებს, რა გავლენა შეიძლება ჰქონდეს სექსუალურ ზრდასრულობას ადამიანის ქცევაზე და რატომაა მნიშვნელოვანი საკუთარ ემოციურ მდგომარეობაზე ზრუნვა.

ლილის ინტიმური ურთიერთობების შიში აქვს, რაც ფსიქოლოგიური მიზეზებითაა გამოწვეული, თუმცა ფიზიკური ლტოლვა მის შემთხვევაში ფსიქოლოგიურ ჩამოუყალიბებლობას ჩრდილავს. ლილის ისტორია თინეიჯერებს ასწავლის, რომ სექსუალურ აქტამდე უნდა დაფიქრდნენ, არიან თუ არა მზად და საკუთარ სხეულსა და გონებას მოუსმინონ.

ასე რომ, სერიალი სექსთან დაკავშირებულ საკითხებზე საინტერესოდ და გულწრფელად გვესაუბრება; გვეხმარება, გავერკვეთ საკუთარ გრძნობებში და გვიბიძგებს, თვითგამორკვევა არ შევწყვიტოთ.

თუკი სერიალის დასამთავრებლად მრავალჯერ გაგითენებია ღამე, ახალ შოუს გამოსვლისთანავე ნახულობ, ან უბრალოდ საყვარელ სერიალზე სასაუბრო სივრცეს ეძებ, მაშინ შემოგვიერდი ჯგუფში — ერთი სერიაც და...

ამავე თემაზე:

• 12 რამ, რაც Sex Education-მა სექსზე, გენდერსა და სექსუალობაზე გვასწავლა