პენიტენციური სამსახურის განცხადებით, შეხვედრების ოთახში მინის ბარიერის აღმართვის მიზეზი ისაა, რომ ექსპრეზიდენტი, მიხეილ სააკაშვილი და მისი ადვოკატები კოვიდრეგულაციებს არღვევდნენ. კერძოდ, უწყების განმარტებით, წერილებს ისინი ერთამანეთს "მაგიდაზე ასვლის გზით" აწვდიდნენ. ამასთან, სააკაშვილი უარს ამბობდა პირბადის გამოყენებაზე.

"აღნიშნული გადაწვეტილება განპირობებულია მხოლოდ მიხეილ სააკაშვილისა და მისი ადვოკატების მხრიდან კოვიდპანდემიიდან გამომდინარე არსებული რეგულაციების სრულად დარღვევით. კერძოდ, მიხეილ სააკაშვილი და მისი ინტერესების დამცველი ადვოკატების მხრიდან ადგილი ჰქონდა დადგენილი რეგულაციების პერმანენტულ დარღვევას. კერძოდ, მაგიდაზე ასვლის გზით შუშის დამცავი ბარიერის ზემოდან უშუალო კონტაქტი და მიხეილ სააკაშვილის მიერ ინდივიდუალური დაცვის საშუალების (პირბადე) გამოყენებაზე უარის თქმა ზრდიდა ვირუსის გავრცელების ალბათობას. ასევე, არსებობდა შუშის ბარიერის დაზიანების საშიშროება, რასაც შესაძლოა რომელიმე პირის დაზიანება მოჰყოლოდა", — ამბობს პენიტენციური.

მათივე განცხადებით, სააკაშვილსა და მისი ადვოკატებს დაწესებულებაში შესვლის დროს ბოლო 72 საათის განმავლობაში ჩატარებული PCR ტესტის პასუხი არცერთხელ არ წარუდგენიათ.

"აღსანიშნავია, რომ ადვოკატისთვის ცნობილია ინფორმაცია იმის შესახებ, რომ ისინი მათი დაცვის ქვეშ მყოფ პირებთან პირისპირ შეხვედრის მხოლოდ ბოლო 72 საათის განმავლობაში ჩატარებული PCR ტესტის უარყოფითი პასუხის შემთხვევაში შეძლებენ, რაც ბრალდებულ/მსჯავრდებულ მიხეილ სააკაშვილის არცერთი ადვოკატის მიერ არ მომხდარა", — აცხადებენ ისინი.

გარდა ამისა, უწყებაში ამბობენ, რომ მიხეილ სააკაშვილს დოკუმენტების ადვოკატებისთვის გადაცემის პრობლემა არასდროს ჰქონია და ამ უფლებით ადმინისტრაციის დახმარებით ახლაც შეუძლია ისარგებლოს. მათივე თქმით, სააკაშვილთან ციხეში განხორციელებული ვიზიტების რაოდენობით დასტურდება, რომ იგი პატიმრისთვის მინიჭებული ყველა უფლებით სარგებლობს.

გუშინ, 27 ოქტომბერს სააკაშვილის ადვოკატმა, დიმიტრი საძალიშვილმა განაცხადა, რომ შეხვედრის ოთახში სივრცე, საიდანაც სააკაშვილს წერილებით ეკონტაქტებოდნენ, ბადით დაფარეს. იმავე დღეს მიხეილ სააკაშვილმა განაცხადა, რომ სანამ შეხვედრათა ოთახს პირვანდელი სახე არ დაუბრუნდება, სააკაშვილი მკურნალობაზე უარს ამბობს.

მანამდე, 26 ოქტომბერს ნაციონალური მოძრაობის სენაკის მერობის კანდიდატმა, კობა ნაყოფიამ განაცხადა, რომ სააკაშვილთან მიმსვლელებს ციხიდან წერილის გამოტანის უფლებას არ აძლევენ. როგორც მან აღნიშნა, დაწესებულებაში შესვლისას გააფრთხილეს, რომ სააკაშვილის წერილის გამოტანა არ შეიძლება. ნაყოფია ამბობდა, რომ ექსპრეზიდენტისგან წერილების მიღება ამიერიდან მხოლოდ ფოსტის ან ადვოკატების დახმარებით იქნებოდა შესაძლებელი. აღნიშნულს პენიტენციურმა სამსახურმა იმავე დღეს უპასუხა. მათი განცხადებით, პატიმართან შეხვედრაზე მისული პირისთვის რაიმე სახის კორესპონდენციის გადაცემა და გამოტანა არც ერთ პენიტენციურ დაწესებულებაში არ ხდება. მათივე თქმით, ადვოკატიც არ არის უფლებამოსილი, რომ ციხიდან ბრალდებულის წერილები გამოიტანოს.

მიხეილ სააკაშვილი პირველ ოქტომბერს დააკავეს. ის 28-ე დღეა შიმშილობს.