წვევამდელი და სამხედრო აღრიცხვის, ასევე სამხედრო სამსახურში გაწვევის უწყისი გამოქვეყნებიდან მე-7 კალენდარულ დღეს ჩაბარებულად ჩაითვლება — სამხედრო სამსახურის ორგანიზების წესში ცვლილებები 1-ელი სექტემბრიდან შევიდა ძალაში. მთავრობის შესაბამისი დადგენილება 31 აგვისტოთი თარიღდება. მას ხელს პრემიერი ირაკლი კობახიძე აწერს.

ბრძანებაში ვკითხულობთ, რომ თუ წვევამდელი გამოძახების შესახებ შეტყობინებას/მოკლე ტექსტურ შეტყობინებას 2 სამუშაო დღის ვადაში არ უპასუხებს, სააგენტო მოთხოვნას ოფიციალურ ვებგვერდზე გამოაქვეყნებს.

"თუ წვევამდელის სამხედრო აღრიცხვაზე აყვანის მიზნით, ამ მუხლის პირველი პუნქტის "ა" — "გ" ქვეპუნქტებით განსაზღვრული ფორმით გამოძახების შესახებ შეტყობინების/უწყების ჩაბარება ვერ ხერხდება ან მათ შორის, მოკლე ტექსტური შეტყობინებით ან ელექტრონული ფოსტით უკუკავშირი არ განხორციელდა 2 სამუშაო დღის ვადაში, ან მისი ფოსტის მეშვეობით გაგზავნა შეუძლებელია, სააგენტო მის ოფიციალურ ვებგვერდზე არაუგვიანეს მე-2 სამუშაო დღისა აქვეყნებს გამოძახების შესახებ შეტყობინებას/უწყებას, რომელიც ჩაბარებულად მიიჩნევა გამოქვეყნებიდან მე-7 კალენდარულ დღეს. ამ შემთხვევაში პირი ვალდებულია წვევამდელის სამხედრო აღრიცხვაზე აყვანის შესახებ შეტყობინების/უწყების ოფიციალურად ჩაბარებიდან 10 კალენდარული დღის ვადაში გამოცხადდეს სააგენტოს შესაბამის სტრუქტურულ ქვედანაყოფში," — ვკითხულობთ ბრძანებაში.

ასევე, ცვლილებების მიხედვით, ჩაბარებულად ჩაითვლება ჯარში გაწვევის უწყება, რომელიც გაწვევაზე პასუხისმგებელი ორგანოს საიტზე გამოქვეყნდება. ეს იმას ნიშნავს, რომ საზღვარგარეთ დროებით წასული წვევამდელი ვალდებული იქნება, უწყების გამოქვეყნებისთანავე საქართველოში დაბრუნდეს და გაწვევის კომისიაში გამოცხადდეს.

ცვლილებებით ასევე განისაზღვრება ის ოჯახის წევრები, რომლებისთვისაც უწყების ჩაბარება შესაძლებელი იქნება.

"შეტყობინება/უწყება ჩაბარებულად ითვლება აგრეთვე იმ შემთხვევაში, თუ წვევამდელის სამხედრო აღრიცხვაზე ასაყვანი პირის ოჯახის სრულწლოვანი წევრი ჩაიბარებს შეტყობინებას/უწყებას ან უარს განაცხადებს მის მიღებაზე. შეტყობინების/უწყების მიღებაზე უარის თქმის შემთხვევაში შეტყობინებაზე/უწყებაზე კეთდება სათანადო აღნიშვნა და უბრუნდება სააგენტოს," — ვკითხულობთ განცხადებაში.