პარლამენტის თავმჯდომარე შალვა პაპუაშვილი ექსპრემიერ ირაკლი ღარიბაშვილის მიერ ციხიდან გამოგზავნილ მე-5 წერილს გამოეხმაურა. პაპუაშვილის შეფასებით, ღარიბაშვილის წერილი "პოლიტიკური ინსინუაციაა" და მისი აზრით, ამ საკითხის პოლიტიკურ ჭრილში გადატანა სუსტ სამართლებრივ პოზიციებზე მეტყველებს.

"ზოგადად, სამწუხაროა, რომ სამართლებრივი საკითხების პოლიტიკურ ჭრილში გადატანა ხდება. ვისურვებდი, რომ პროკურატურისა თუ გამოძიების მიერ წარდგენილ ბრალსა და სამართლებრივ პრეტენზიებს არგუმენტირებული, სამართლებრივივე პასუხები გაეცეს.

მსგავსი საკითხების პოლიტიკურ სივრცეში გადატანის მცდელობები მანამდეც გვინახავს, თუმცა ამას არანაირი შედეგი არ მოაქვს. არსებობს კონკრეტული ბრალდება და სამართლებრივი პროცესი, რომელსაც შესაბამისი პასუხი სჭირდება.

ამ საკითხის პოლიტიკურ ჭრილში გადატანა მხოლოდ იმას მოწმობს, რომ სამართლებრივი პოზიციები სუსტია, ხოლო პოლიტიკური ინსინუაციები სრულიად ზედმეტი," — განაცხადა შალვა პაპუაშვილმა.

ჟურნალისტების დასმულ კითხვაზე, თუ რატომ არ ხდება უფლებადამცველ ლაზარე ჯორბენაძის თვითმკვლელობის საქმის გამოძიება, პაპუაშვილმა ირაკლი ღარიბაშვილის მიერ ამ თემაზე კითხვების დასმა კვლავ პოლიტიკურ ინსინუაციად შეაფასა და საზოგადოებას "გარდაცვლილის სულის მოსვენებისკენ" მოუწოდა.

"ზოგადად, არავის ვუსურვებდი, რომ სხვა ადამიანების პირადული ტრაგედიების გამოყენება ხდებოდეს პოლიტიკური ინსინუაციებისთვის. ეს მეთოდი ჩვენ ვიცით, ვინ იყენებს ამ მეთოდებს და უკვე წლებია, შეჩვეული ვართ ჩვენ, რომ ხდება სხვადასხვა ტრაგედიების გამოყენება — თვითმკვლელობა იქნება თუ სხვა სახის ტრაგედია იმისთვის, რომ პოლიტიკური ინსინუაციები მოხდეს. [...]

სუფთა ადამიანურადაც, პოლიტიკურადაც და საღი განსჯის საფუძველზეც, მნიშვნელოვანია, რომ ამ ადამიანის გარდაცვლილი სული მოვასვენოთ. ის, რომ ადამიანმა თვითმკვლელობა ჩაიდინა, ცალკე სიმძიმეა და ამის ასე ტირაჟირება არასწორია. თქმა ყველაფრის შეიძლება, მაგრამ სათქმელს ხომ უნდა ჰქონდეს რაიმე საფუძველი?! როდესაც არანაირი საფუძველი არ არსებობს, უბრალოდ არასწორია ასე მსჯელობა. ზედმეტი ინსინუაციებით, გარდაცვლილი ადამიანით სპეკულირებითა თუ მისი პოლიტიკური მიზნით გამოყენებით, არ მგონია, რომ ვინმე სწორად იქცეოდეს — არც მისი კეთილისმყოფელები, არც გარემოცვა და არც ზოგადად საზოგადოება," — განაცხადა პაპუაშვილმა.

რაც შეეხება ჟურნალისტების დასმულ კითხვას — ჩატარდა თუ არა შიდაპარტიული კვლევა და ადასტურებს თუ არა ირაკლი ღარიბაშვილის ადვოკატის ვერსიას, რომ ირაკლი ღარიბაშვილის რეიტინგი გაიზარდა — პაპუაშვილმა მსგავსი ფაქტი უარყო.

"[შიდაპარტიული კვლევა] პერიოდულად ტარდება ხოლმე. რა იზომება და როგორ შიდა კვლევის საკითხი არის. ადვოკატის განცხადება იყო რეიტინგებთან დაკავშირებით, რომ როგორც წესი, კვლევას ატარებენო და ალბათ, ჩაატარესო. თვითონაც "ალბათ"-ს ამბობენ და თან მერე დასკვნები გამოაქვთ. არასერიოზულია ასეთი დამოკიდებულება ზოგადად, მითუმეტეს ასეთ საკითხებთან დაკავშირებით," — განაცხადა პაპუაშვილმა.

ექსპრემიერმა ირაკლი ღარიბაშვილმა ციხიდან მე-5 წერილი გამოაქვეყნა, სადაც წერს, რომ "მდინარაძის პოლიტიკიდან გაყვანა ვერ წაშლის მისი და ირაკლი კობახიძის ქვეყნისთვის, ადამიანებისთვის და ქართული ოცნებისთვის მიყენებულ უმძიმეს და გამოუსწორებელ ზიანს".

ღარიბაშვილი უფლებადამცველ ლაზარე ჯორბენაძის გარდაცვალების გარემოებების და რეალური მიზეზის გარკვევასაც ითხოვს და სვამს კითხვას, ნამდვილად იყო თუ არა მისი გარდაცვალება თვითმკვლელობა და რა გახდა ამის რეალური მიზეზი?

წერილის ბოლოს ექსპრემიერი იმასაც წერს, რომ "საზოგადოებაში დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს".