პროკურატურამ ადვოკატ ია სირანაშვილის მიმართ განხორციელებული შესაძლო ძალადობის ფაქტზე გამოძიება დაიწყო. მათი ცნობით, "სისხლის სამართლის საქმეზე ჩატარდება ყველა საჭირო საგამოძიებო და საპროცესო მოქმედებები, რომლის შედეგების შესახებ დამატებით ეცნობება საზოგადოებას".

"თბილისის პროკურატურის საგამოძიებო სამმართველოში, საქართველოს შინაგან საქმეთა სამინისტროს თანამშრომელთა მხრიდან ადვოკატ ია სირანაშვილის მიმართ განხორციელებული შესაძლო ძალადობის ფაქტთან დაკავშირებით, გამოძიება სამსახურებრივი უფლებამოსილების ძალადობით გადამეტების ფაქტზე დაიწყო, დანაშაული გათვალისწინებული საქართველოს სსკ-ის 333-ე მუხლის მესამე ნაწილის "ბ" ქვეპუნქტით", — წერია პროკურატურის მიერ გავრცელებულ ინფორმაციაში.

შეგახსენებთ, რომ 1-ელ სექტემბერს, ბიზნესმენ თამაზ ელიზბარაშვილის სახლში ჩხრეკას ესწრებოდა ადვოკატი ია სირანაშვილი, მოგვიანებით კი მას, როგორც თავად ჰყვება, ადგილი ძალით დაატოვებინეს, თამაზ ელიზბარაშვილი კი დააკავეს. ადვოკატი ჟურნალისტებთან აცხადებდა, რომ სამართალდამცავებმა მასზე ფიზიკურად იძალადეს.