საქართველოში პატიმრობაში მყოფი და შემდეგ მიხეილ ყაველაშვილის მიერ შეწყალებული რუსი აქტივისტის, დენის კულანინის ქვეყნიდან დეპორტაციის გადაწყვეტილებას Amnesty International ეხმაურება. ორგანიზაციის აღმოსავლეთ ევროპისა და ცენტრალური აზიის დირექტორის მოადგილის, დენის კრივოშეევის განცხადებით, კულანინს რუსეთში გაძევების შემთხვევაში, მისი პოლიტიკური შეხედულებების გამო, თავისუფლების აღკვეთა, წამება და სხვაგვარი არასათანადო მოპყრობა ემუქრება.

ორგანიზაცია საქართველოს მთავრობას მოუწოდებს, უზრუნველყოს რუსი აქტივისტის უსაფრთხოება და მიეცეს მას უფლება, მესამე ქვეყანაში გაემგზავროს.

"დენის კულანინი საჯაროდ ეწინააღმდეგებოდა რუსეთის ომს უკრაინის წინააღმდეგ და მხარს უჭერდა ალექსეი ნავალნის — ორივე ეს ქმედება რუსეთში დანაშაულად ითვლება და პატიმრობით ისჯება. საქართველოს ხელისუფლებამ უნდა უზრუნველყოს, რომ იგი არ იქნეს დეპორტირებული რუსეთში, სადაც ომის საწინააღმდეგო დისიდენტობის მკაცრი რეპრესიების ამჟამინდელ პირობებში, მას შესაძლოა შეექმნას თვითნებური სისხლისსამართლებრივი დევნისა და პატიმრობის, წამების ან სხვაგვარი არასათანადო მოპყრობის რეალური რისკი.

საქართველო ვალდებულია დაიცვას იძულებითი დაბრუნების აკრძალვის (non-refoulement) პრინციპი, რაც კრძალავს ნებისმიერი პირის იმ ქვეყანაში გადაცემას, სადაც მას ადამიანის უფლებების სერიოზული დარღვევის რეალური საფრთხე ემუქრება. საქართველოს ხელისუფლებამ ასევე უნდა უზრუნველყოს, რომ დენის კულანინს შეეძლოს ეფექტიანად მოითხოვოს საერთაშორისო დაცვა, მათ შორის, ნებაყოფლობით გაემგზავროს უსაფრთხო მესამე ქვეყანაში," — წერს ორგანიზაცია.

27 აგვისტოს დენის კულანინი მიხეილ ყაველაშვილმა შეიწყალა, თუმცა გათავისუფლებისთანავე მიგრაციის დეპარტამენტში გადაიყვანეს და საქართველოდან გაძევების პროცედურა დაიწყო. 30 აგვისტოს სასამართლომ მისი მიგრაციის დეპარტამენტის დროებით განთავსების ცენტრში დატოვება გადაწყვიტა, მაქსიმუმ 3 თვით, გაძევების პროცედურის დასრულებამდე. SOVA-ს ცნობით, კულანინს უკვე ჰქონდა ბილეთი სომხეთში, ერევანში, და სწორედ იქ წასვლა სურდა, მაგრამ ადვოკატის ინფორმაციით, 1-ელ სექტემბერს გაფრენის საშუალება არ მიეცა.

შეგახსენებთ, რომ კულანინი 2025 წლის 30 აგვისტოს იმავე წლის მარტში აქციაზე პოლიციის მანქანის დაზიანებისთვის დააკავეს და 2 წლით პატიმრობა მიუსაჯეს.