მესამე პრეზიდენტის, მიხეილ სააკაშვილის ადვოკატი დიმიტრი საძაგლიშვილი აცხადებს, რომ ციხეში, შეხვედრის ოთახში სივრცე, საიდანაც წერილებს აწვდიდნენ, ბადით დაფარეს. საძაგლიშვილის თქმით, ამის მიზანი ადვოკატებსა და სააკაშვილს შორის პირდაპირი კომუნიკაციისთვის ხელის შეშლა და მათი საუბრის ხელისუფლების მხრიდან გაკონტროლებაა.

"მიხეილ სააკაშვილს ფაქტობრივად წაართვეს საერთოდ დაცვის უფლება, ვინაიდან ადვოკატებს აღარ გვაქვს შესაძლებლობა მასთან კომუნიკაციის. მოგეხსენებათ, რომ მისი და ჩვენი შეხვედრის ოთახი აღჭურვილია ვიდეოკამერებით და ცხადია, ხორციელდება აგრეთვე აუდიო ჩაწერა. იმისთვის რომ ჩვენი კომუნიკაცია ყოფილიყო დაცული, ჩვენ მას წერილობით ვეკონტაქტებოდით, რისთვისაც მაღლა დატოვებული იყო სივრცე, ანუ არ იყო ჩვენ შორის ბარიერი ბოლომდე ამოვსებული. დღეს, როდესაც შევედით შეხვედრების ოთახში, აღმოვაჩინეთ, რომ ამ ოთახშიც რემონტი ჩაუტარებიათ და ეს სივრცეც იყო ამოქოლილი, ანუ ამოაშენეს ბარიერი ბოლომდე, რომ ჩვენ არ გვქონდეს მიხეილ სააკაშვილთან პირდაპირი კომუნიკაცია და ყველა კომუნიკაცია იყოს გაკონტროლებული ხელისუფლების მხრიდან", — აცხადებს საძაგლიშვილი.

ადვოკატის თქმით, ციხის ადმინისტრაციამ განმარტა, რომ ბარიერი ბოლომდე კოვიდუსაფრთხოების დაცვის მიზნით ამოავსეს. თუმცა, საძაგლიშვილი აღნიშნავს, რომ ბარიერი ბადით ამოქოლეს და ეს ვირუსის გავრცელებას ხელს ვერ შეუშლის.

"სასაცილო არგუმენტი დაგვახვედრა ციხის ადმინისტრაციამ, რომ თურმე კოვიდუსაფრთხოების დაცვის გამო იქნა ეს ბარიერი ბოლომდე აშენებული. ამას გვეუბნება ხელისუფლება, რომელიც თავად აორგანიზებს ძალიან მრავალრიცხვოვან აქციას მათი განცხადებით და ამას გვეუბნება სასჯელაღსრულების დაწესებულება, რომელმაც შუაში ბადე გააკეთა, ანუ ხმა რომ ბოლომდე არ დახშულიყო, ბადე არის ამ ბარიერის ნაწილი. ცხადია, ბადე რომ კოვიდს ვერანაირად ვერ შეაკავებს ნებისმიერი გონიერი ადამიანი ხვდება", — განაცხადა საძაგლიშვილმა.

გუშინ, 26 ოქტომბერს, ნაციონალური მოძრაობის სენაკის მერობის კანდიდატმა, კობა ნაყოფიამ განაცხადა, რომ სააკაშვილთან მიმსვლელებს ციხიდან წერილის გამოტანის უფლებას არ აძლევენ. როგორც მან აღნიშნა, დაწესებულებაში შესვლისას გააფრთხილეს, რომ სააკაშვილის წერილის გამოტანა არ შეიძლება. ნაყოფია ამბობდა, რომ ექსპრეზიდენტისგან წერილების მიღება ამიერიდან მხოლოდ ფოსტის ან ადვოკატების დახმარებით იქნებოდა შესაძლებელი.

პენიტენციური სამსახურის განცხადებით, პატიმართან შეხვედრაზე მისული პირისთვის რაიმე სახის კორესპონდენციის გადაცემა და გამოტანა არც ერთ პენიტენციურ დაწესებულებაში არ ხდება. მათივე თქმით, ადვოკატიც არ არის უფლებამოსილი, რომ ციხიდან ბრალდებულის წერილები გამოიტანოს.