სპეციალური პენიტენციური სამსახური სახალხო დამცველის, ლევან იოსელიანის იმ განცხადებას ეხმაურება, რომელიც მან ექსპრემიერ ირაკლი ღარიბაშვილის ციხეში მონახულების შემდეგ გააკეთა. პენიტენციური სამსახური უარყოფს იოსელიანის ნათქვამს, თითქოს სამსახურმა ღარიბაშვილს ოჯახთან წახალისების სახით პაემანი ჩაუნიშნა, რომელიც შემდეგ დაწესებულებაში მიმდინარე ინფრასტრუქტურული სამუშაოების გამო გაუქმდა.

მათ მიერ გავრცელებულ განცხადებაში ხაზგასმულია, რომ ექსპრემიერს ის პაემანი "ვერ გაუუქმდებოდა, რადგან ჩანიშნული არც არასდროს ყოფილა".

"სპეციალური პენიტენციური სამსახური ეხმიანება საქართველოს სახალხო დამცველის, ლევან იოსელიანის განცხადებას, რომელიც მან მსჯავრდებულ ირაკლი ღარიბაშვილთან შეხვედრის შემდეგ გააკეთა; რომ თითქოს მსჯავრდებულს წახალისების სახით ჩანიშნული ჰქონდა პაემანი, რომელიც პენიტენციურ დაწესებულებაში მიმდინარე ინფრასტრუქტურული სამუშაოების გამო გაუქმდა. ცალსახად და დაბეჯითებით ვაცხადებთ, რომ არანაირი პაემანი ჩანიშნული არ ყოფილა და, შესაბამისად, ვერც გაუქმდებოდა.

აქვე, კიდევ ერთხელ განვმარტავთ, რომ დახურული ტიპის დაწესებულების (რომელშიც განთავსებულია მსჯავრდებული ღარიბაშვილი) დებულების შესაბამისად, მსჯავრდებულ ღარიბაშვილს აქვს წელიწადში ორი ხანგრძლივი და თვეში ერთი ხანმოკლე პაემნის გამოყენების უფლება და ეს ლიმიტები მას სრულად აქვს ათვისებული.

რაც შეეხება წახალისების ფორმით თავისუფლებააღკვეთილი პირისთვის დამატებითი პაემნის დანიშვნას, ეს ხდება პენიტენციური დაწესებულების დირექტორის განკარგულებით, რაც მსჯავრდებულ ღარიბაშვილის შემთხვევაში არ მომხდარა. ამდენად, ინფრასტრუქტურული სამუშაოები, რომლებიც ყველა პენიტენციურ დაწესებულებაში პერიოდულად ხორციელდება, არაფერ შუაშია. პაემანი არც ჩანიშნულა და არც გაუქმებულა," — წერს სამსახური.

სახალხო დამცველმა, ლევან იოსელიანმა საპატიმროში ექსპრემიერ ირაკლი ღარიბაშვილის მონახულების შემდეგ განაცხადა, რომ ციხის ადმინისტრაციამ ექსპრემიერს შვილებთან პაემანი რემონტის გამო გაუუქმა.

"პერიოდულად ის იღებდა წამახალისებელ პაემნების შესაძლებლობას და ეს ამბავი, რაც მოხდა მათი განცხადებით, დაკავშირებულია რაღაც ინფრასტრუქტურულ საკითხთან, რემონტი მიმდინარეობდა კონკრეტულ პერიოდში და ამიტომ ვერ მოხერხდა მათგან ამ პაემნის ჩანიშვნა. თუმცა, სამომავლოდ რაიმე ტიპის უარყოფა, ან უარი იმასთან დაკავშირებით, რომ მას მიეცეს ასეთი პაემნების შესაძლებლობა, ციხის ადმინისტრაციას არ დაუფიქსირებია", — განაცხადა იოსელიანმა "ტვ პირველთან" საუბრისას.

31 აგვისტოს კი IPN-მა გაავრცელა პენიტენციური სამსახურის კომენტარი "გაუქმებულ პაემნებთან" დაკავშირებით, სადაც ნათქვამი იყო, რომ "არ ყოფილა პაემანი და არც გაუქმებულა".

• იოსელიანი აცხადებს, რომ ღარიბაშვილს შვილებთან პაემანი რემონტის გამო გაუუქმეს