1-ელ სექტემბერს, დაახლოებით საღამოს 9 საათზე, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ იარაღს ეძებდნენ.

მედიასთან საუბრისას ელიზბარაშვილი აცხადებდა, რომ მასზე ტერორი ხორციელდება და ამ ყველაფერს წინ უძღოდა, 2 დღის წინ ერთ-ერთ რესტორანში 8 პირთან სიტყვიერი დაპირისპირება, რომლებიც მას "იმედის" თანამშრომლებად გაეცვნენ. ელიზბარაშვილი და მისი ცოლი ჰყვებიან, ამ პირებს პრეტენზიები ელიზბარაშვილის გამონათქვამებთან დაკავშირებით ჰქონდათ რუსებისა და რუსეთის, როგორც ოკუპანტი ქვეყნის წინააღმდეგ და სთხოვდნენ, ბოდიში მოეხადა საკუთარი პოლიტიკური შეხედულებების გამო.

"უკანონობაა რასაც აკეთებენ, ადგილი აქვს ჩემს დაშინებას. ჯერ იმ რვა ადამიანმა ვერ დამაშინა გუშინწინ და ახლა პოლიციას უნდა, რომ დამაშინოს. ეგ არ გამოვა. 8 თვის ბავშვი ხელში მეჭირა, ბავშვი დამიშინეს, დამიწიოკეს, მერე ბავშვის ჩანთაში იქექებოდნენ, ბავშვის საკვები მედო და საწოვარა. არ ვიცი, ტერორს მიწყობენ... გუშინ რესტორანში 8 კაცმა ჩემზე და ჩემს ცოლზე ტერორი მოახდინა", — განაცხადა "ტვ პირველთან" საუბრისას ელიზბარაშვილმა.

ბიზნესმენის სახლში ჩხრეკას ესწრებოდა ადვოკატი ია სირანაშვილი, მოგვიანებით კი მას, როგორც თავად ჰყვება, ძალით დაატოვებინეს ადგილი. თამაზ ელიზბარაშვილი კი დააკავეს. ადვოკატი ჟურნალისტებთან აცხადებდა, რომ სამართალდამცავებმა მასზე ფიზიკურად იძალადეს.

"ტელეფონი დამაგდებინეს, წამაქციეს, წიხლებით შემდგნენ, არ შემიშვეს შიგნით, სადაც საგამოძიებო მოქმედებები მიმდინარეობდა. გამომაგდეს, კარები გადამიკეტეს, წიხლებით შემდგა ერთი 5 პოლიციელი ერთად, ძალიან ცუდად ვარ, გვერდები მტკივა, ღვიძლში მირტყეს ფეხები და წიხლები. 5 კაცმა წიხლებით გამიგდეს, ეს რა ქვეყანაში ვცხოვრობთ, თქვენ ნორმალურები ხართ? ეს პოლიციელები არიან თუ კრიმინალები? ასეთი რამე მე ცხოვრებაში არ გამომივლია. წინა რეჟიმის დროსაც ადვოკატი ვიყავი და ახლაცს", — განაცხადა ადვოკატმა "ტვ პირველთან" საუბრისას.

ბიზნესმენი თამაზ ელიზბარაშვილი საქართველოს ადმინისტრაციულ სამართალდარღვევათა კოდექსის 173-ე მუხლითაა დაკავებული, რაც პოლიციელის კანონიერი მოთხოვნისადმი დაუმორჩილებლობას გულისხმობს. რაც შეეხება ავტომობილში ჩხრეკას, შსს-ს ცნობით, მუქარისა და იარაღის უკანონო შეძენა-შენახვის საქმეზე მიმდინარე გამოძიების ფარგლებში ჩატარდა.

ბოლო ინფორმაციით, ელიზბარაშვილის სოციალურ ქსელში ვრცელდება ინფორმაცია, რომ მან შიმშილობა დაიწყო.

"დღევანდელი უსამართლობის შემდეგ, თამაზ ელიზბარაშვილმა შიმშილობა დაიწყო. გადაყვანილია ქალაქ თბილისის მთავარ სამმართველოში, დიღომში", — წერია ბიზნესმენის ფეისბუქ-გვერდზე.