ადვოკატთა ასოციაციის თავმჯდომარე ირაკლი ყანდაშვილი ეხმაურება ადვოკატ ია სირანაშვილის მიერ საჯაროდ გავრცელებულ ინფორმაციას, რომლის თანახმადაც, პოლიციის თანამშრომლებმა ძალის გამოყენებით ხელი შეუშალეს პროფესიული საქმიანობის განხორციელებაში და მასზე იძალადეს.

ყანდაშვილი სოციალურ ქსელში წერს, რომ "ადვოკატის პროფესიული საქმიანობის ხელშეშლა და, მით უმეტეს, მის მიმართ ნებისმიერი სახის ძალადობა არის დაუშვებელი! ადვოკატს უნდა ჰქონდეს შესაძლებლობა, დამოუკიდებლად და შეუფერხებლად განახორციელოს თავისი პროფესიული საქმიანობა და დაიცვას მისი დაცვის ქვეშ მყოფის ინტერესები".

"კოლეგებთან ერთად ვიმყოფებოდი კლინიკა "ვივამედში", სადაც ჩვენი კოლეგა, ადვოკატი ია სირანაშვილია გადაყვანილი. ჩვენ ერთი დიდი პროფესიული ოჯახი ვართ და, რა თქმა უნდა, ასეთ დროს ჩვენი კოლეგის მიმართ სრული სოლიდარობა და მხარდაჭერა გვაერთიანებს.

ადვოკატის განცხადებით, დაცვის ქვეშ მყოფის სახლში ჩატარებული ჩხრეკის დროს მას ხელი შეეშალა პროფესიული საქმიანობის განხორციელებაში და სამართალდამცავების მხრიდან ადგილი ჰქონდა მის მიმართ ფიზიკურ ძალადობას.

მსგავსი განცხადება არის უკიდურესად მძიმე საკითხი, რომელიც საჭიროებს დაუყოვნებლივ და ობიექტურ გამოძიებას. აუცილებელია, დადგინდეს ყველა გარემოება და მიეცეს მას სათანადო სამართლებრივი შეფასება.

ადვოკატის პროფესიული საქმიანობის ხელშეშლა და, მით უმეტეს, მის მიმართ ნებისმიერი სახის ძალადობა არის დაუშვებელი! ადვოკატს უნდა ჰქონდეს შესაძლებლობა, დამოუკიდებლად და შეუფერხებლად განახორციელოს თავისი პროფესიული საქმიანობა და დაიცვას მისი დაცვის ქვეშ მყოფის ინტერესები.

მოვუწოდებ შესაბამის საგამოძიებო ორგანოებს, დაუყოვნებლივ დაიწყონ ფაქტზე გამოძიება და უზრუნველყონ ყველა გარემოების სრულყოფილი, ობიექტური და დროული შესწავლა", — წერს ადვოკატთა ასოციაციის თავმჯდომარე ირაკლი ყანდაშვილი.

შეგახსენებთ, რომ გუშინ, 1-ელ სექტემბერს, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ იარაღს ეძებდნენ.

ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს — რა ვიცით?
ბიზნესმენის სახლში ჩხრეკას ესწრებოდა ადვოკატი ია სირანაშვილი, მოგვიანებით კი მას, როგორც თავად ჰყვება, ბინა ძალით დაატოვებინეს, თამაზ ელიზბარაშვილი კი დააკავეს. ადვოკატი ჟურნალისტებთან აცხადებდა, რომ სამართალდამცავებმა მასზე ფიზიკურად იძალადეს.

"ტელეფონი დამაგდებინეს, წამაქციეს, წიხლებით შემდგნენ, არ შემიშვეს შიგნით, სადაც საგამოძიებო მოქმედებები მიმდინარეობდა. გამომაგდეს, კარები გადამიკეტეს, წიხლებით შემდგა ერთი 5 პოლიციელი ერთად, ძალიან ცუდად ვარ, გვერდები მტკივა, ღვიძლში მირტყეს ფეხები და წიხლები. 5 კაცმა წიხლებით გამიგდეს, ეს რა ქვეყანაში ვცხოვრობთ, თქვენ ნორმალურები ხართ? ეს პოლიციელები არიან თუ კრიმინალები? ასეთი რამე მე ცხოვრებაში არ გამომივლია. წინა რეჟიმის დროსაც ადვოკატი ვიყავი და ახლაც", — განაცხადა ადვოკატმა "ტვ პირველთან" საუბრისას.

შეგახსენებთ, რომ ადვოკატ ია სირანაშვილის მიმართ განხორციელებული შესაძლო ძალადობის ფაქტზე პროკურატურამ გამოძიება უკვე დაიწყო.