უკრაინის პრეზიდენტი ვოლოდიმირ ზელენსკი ავიაკომპანიებს, რომლებიც რუსეთის ცას იყენებენ მოუწოდებს, რომ ფრენები შეაჩერონ, რადგან უკრაინული დრონების გამო რუსეთის ცა უსაფრთხო აღარაა. ამის შესახებ მან 1-ელ სექტემბერს განაცხადა.

რუსეთის პრეზიდენტმა ვლადიმირ პუტინმა ამას "სახელმწიფო ტერორიზმისკენ გადადგმული ნაბიჯი" უწოდა და კიდევ ერთხელ ისაუბრა ფრონტის ხაზის შესახებ თავის ხედვაზე, ასევე განაცხადა, რომ მოახლოებული მობილიზაციის შესახებ გავრცელებული ცნობები "სრული სისულელეა". ეს ყველაფერი იმ ფონზე მოხდა, როდესაც მედიაში გავრცელდა ცნობები პუტინის მზადყოფნაზე, ომი კიდევ უფრო გაამწვავოს და, ამავდროულად, აშშ-ის მცდელობებზე, სამშვიდობო მოლაპარაკებები განაახლოს.

"დღეს გვინდა გავაფრთხილოთ ყველა ავიაკომპანია, რომელიც რუსეთის საჰაერო სივრცეს იყენებს, ყველა სადაზღვევო კომპანია და ყველა ის ადამიანი, ვინც კვლავ სარგებლობს რუსეთის ძირითადი აეროპორტებით: რუსეთის ცა სრულად სახიფათო ხდება", — განაცხადა ზელენსკიმ სამშაბათს საღამოს.

"უბრალოდ, რუსეთის ცაში დრონები იფრენენ და ეს უნდა გაითვალისწინონ. მიუხედავად იმისა, რომ რუსეთის ხელისუფლება ამის შესახებ სათანადოდ არ ატყობინებს საზოგადოებას, ფაქტობრივად, რუსეთის ცა დაიკეტება: რუსეთის მიერ გაჩაღებული ომი მის ცას კეტავს", — დასძინა მან.

ვლადიმირ პუტინმა ზელენსკის განცხადება შანხაის თანამშრომლობის ორგანიზაციის სამიტის შემდეგ, ჟურნალისტების კითხვებზე პასუხისას, ადგილობრივი დროით ღამის 3 საათზე შეაფასა.

"ასეთი განცხადებები არ მომისმენია, მაგრამ თუ ეს ხმამაღლა ითქვა, ეს უბრალოდ სახელმწიფო ტერორიზმისკენ გადადგმული ნაბიჯია", — ციტირებს პუტინს "ინტერფაქსი".

შეუძლია თუ არა უკრაინას რუსეთის "ცის დახურვა"?

განმარტავს BBC-ის რუსული სამსახურის სამხედრო მიმომხილველი პაველ აქსიონოვი:

უკრაინის პრეზიდენტის მუქარა, რომ რუსეთის ცას სამოქალაქო ავიაციისთვის დახურავს, ცარიელ მუქარად არ გამოიყურება. უკრაინის შეიარაღებულ ძალებს აეროპორტების დისტანციურად "დაკეტვის" არაერთი შესაძლებლობა აქვთ.

ამისთვის თვითმფრინავებზე ან აეროპორტებზე თავდასხმა აუცილებელი არ არის. აეროპორტი იკეტება, თუ მის საჰაერო სივრცეში უკრაინული დრონი გამოჩნდება. ასეთ შემთხვევაში მოქმედებაში მოდის გეგმა "კოვიორი" ("ხალიჩა"), სრულად წყდება ფრენები, ხოლო ჰაერში მყოფმა თვითმფრინავებმა ეს ტერიტორია უნდა დატოვონ.

უკრაინის შორ მანძილზე მოქმედი უპილოტო აპარატების რაოდენობა იზრდება და მსგავსი ოპერაციებისთვის საჭირო რესურსებიც სულ უფრო მეტი ხდება