ნაციონალური მოძრაობის სენაკის მერობის კანდიდატის, კობა ნაყოფიას განცხადებით, ექსპრეზიდენტ მიხეილ სააკაშვილთან მიმსვლელებს ციხიდან წერილის გამოტანის უფლებას არ აძლევენ. როგორც ის აცხადებს, დაწესებულებაში შესვლისას გააფრთხილეს, რომ სააკაშვილის წერილის გამოტანა არ შეიძლება.

"დღევანდელი ამბავი არის ის, რომ მასთან მიმსვლელს უკვე წერილსაც კი არ ატანენ. აი, პირდაპირ, როცა შევდიოდით, გამაფრთხილეს მე პირადად, რომ წერილის გამოტანა მიხეილ სააკაშვილის არ შეიძლება", — განაცხადა კობა ნაყოფიამ ჟურნალისტებთან.

ნაყოფიას ინფორმაციით, ექსპრეზიდენტისგან წერილების მიღება ამიერიდან მხოლოდ ფოსტის ან ადვოკატების დახმარებით იქნება შესაძლებელი.

"ერთადერთი შესაძლებლობა, ალბათ, რომ მივიღოთ მისგან წერილები, იქნება ფოსტა ან ადვოკატი. ანუ პარლამენტის წევრი, რომელიც მასთან შევა ან ექიმი ან სხვა ოჯახის წევრი, წერილს მიხეილ სააკაშვილისგან ვერ წამოიღებს. გასაგებია, რომ ჯერ ხმის ეშინიათ, სასამართლო პროცესი გადადეს, რომ ხალხმა ვერ დაინახოს... თვითონ ეცინება ხოლმე და ხუმრობს თავის კალიგრაფიაზე მიხეილ სააკაშვილი, ეს ცნობილია და ახლა უკვე ამ კალიგრაფიით დაწერილი წერილისაც ეშინიათ", — თქვა კობა ნაყოფიამ.

ექსპრეზიდენტი მიხეილ სააკაშვილი პირველ ოქტომბერს დააკავეს. ის დაპატიმრებიდან 26 დღეა შიმშილობს.