ქართული ოცნების დეპუტატი, შალვა პაპუაშვილი ოპოზიციასა და არასამთავრობო ორგანიზაციებს ცენტრალური საარჩევნო კომისიის ყოფილი თავმჯდომარის, თამარ ჟვანიასთვის ბოდიშის მოხდისკენ მოუწოდებს. პაპუაშვილის მტკიცებით, 2 ოქტომბრის არჩევნებით დადასტურდა, რომ ჟვანიას მიმართ 2020 წლის არჩევნების დროს გამოთქმული ბრალდებები "ფარსი და ტყუილი" იყო.

მისივე თქმით, მათ ბოდიში უნდობლობის გამოცხადებისთვის ცესკოს ახლანდელ თავმჯდომარეს, გიორგი კალანდარიშვილსაც უნდა მოუხადონ.

"მაშინაც ვამბობდი, რომ ბოდიში მოეხადათ ქალბატონი თამარ ჟვანიასთვის. ამ არჩევნებით დადასტურდა ერთი რამ (გარდა იმისა, რომ მანამდეც საგამოძიებო კომისიის სხვა ფაქტებით დადასტურებული იყო) — რომ ყველა ბრალდება მის მიმართ იყო ფარსი და ტყუილი.

მინდა კიდევ ერთხელ მოვუწოდო არასამთავრობო ორგანიზაციებს, რომლებმაც მაშინ არც კი დაიცვეს თამარ ჟვანია და მოვუწოდო ოპოზიციას, რომელიც პირდაპირ ქალბატონი თამარის ბრალმდებელი იყო, ახლა მაინც მოუხადეთ ბოდიში ქალბატონ თამარ ჟვანიას და ახლა მაინც მოუხადეთ ბოდიში ბატონ გიორგი კალანდარიშვილს, რომელსაც თქვენ არ გამოუცხადეთ ნდობა", — თქვა პაპუაშვილმა პარლამენტის სხდომაზე.

2020 წლის არჩევნების შემდეგ ოპოზიცია ცესკოს ყოფილ თავმჯდომარეს, თამარ ჟვანიას არჩევნების გაყალბებაში ადანაშაულებდა და მის გადადგომას ითხოვდა. ჟვანიას გადადგომის მოთხოვნა ჟღედრებოა ელჩების ფასილიტაციით გამართულ შეხვედრების პერიოდშიც. ჟვანიას გადადგომის მოთხოვნებს არ აღიარებდნენ ქართულ ოცნებაში. თამარ ჟვანია 30 ივნისს გადადგა, ამის შესახებ მან Facebook გვერდზე დაწერა. მანამდე, 21 ივნისს ჟვანია ამბობდა, რომ "არსად წასვლას არ აპირებდა".

საარჩვენო კანონმდებლობის რეფორმა შარლ მიშელის დოკუმენტის ერთ-ერთი მთავარი საკითხია. 28 ივნისს პარლამენტმა უკვე დაამტკიცა ცვლილებები საარჩვენო კოდექსში, რომელიც ცესკოს თავმჯდომარის ახალ წესს ითვალისწინებს.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება, მათ შორის, თბილისშიც. რაც შეეხება პარტიულ შედეგებს, დათვლილია უბნების 100% — ქართულ ოცნებას ხმების 46,74% აქვს, ნაციონალურ მოძრაობას კი 30,68%.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.