ოჯახის ექიმებსა და ექთნებს, ვინც აქტიურად ჩაერთვებიან ვაქცინაციის წამახალისებელ კამპანიაში ხელფასზე დანამატი დაერიცხებათ. ჯანდაცვის მინისტრის მოადგილის, თამარ გაბუნიას ინფორმაციით, შესაბამისი პროგრამა მიმდინარე კვირის ბოლოს ამოქმედდება.

გაბუნიას თქმით, პროგრამის მიზანი, ძირითადად, სოფლად მცხოვრები, 60 წელს გადაცილებული მოსახლების აცრაა. მინისტრის მოადგილე ამბობს, რომ მოსახლეობის ამ ნაწილში ვაქცინაციის მაჩვენებელი დაბალია.

"ოჯახის ექიმების და ექთნების წახალისების სქემა, პირველ რიგში, ითვალისწინებს იმას, რომ ოჯახის ექიმმა და ექთანმა ჩაატაროს კონსულტაცია და 60 წლის ზემოთ მოქალაქეს, დეტალურად აუხსნას ვაქცინაციის სიკეთეები, გვერდითი მოვლენები და ა.შ.

ამისთვის განსაზღვრული თანხა არის 20 ლარის ოდენობით, საიდანაც 80% უნდა მოხმარდეს ექიმისა და ექთნის ანაზღაურებას და 20% შეიძლება დაიხარჯოს ადმინისტრაციულ რესურსზე", — განმარტავს თამარ გაბუნია.

მისი თქმით, პროგრამის დასაფინანსებელი სქემა შედეგზეა ორიენტირებული, რაც გულისხმობს, რომ ექიმები და ექთნები დანამატს მხოლოდ იმ შემთხვევაში მიიღებენ, თუ მათ სამიზნე პაციენტი აიცრება.

"იმ შემთხვევაში, თუ მოქალაქე აიცრება, ექიმი და ექთანი მიიღებს ასანაზღაურებელი თანხის 50%-ს, პირველი აცრის შემდეგ, მეორე აცრის შემდეგ მიიღებს მეორე 50%-ს. ამდენად, ეს არის შედეგზე ორიენტირებული დაფინანსების სქემა, რომელიც ითვალისწინებს ანაზღაურებას მხოლოდ მას შემდეგ, რაც შედეგი დადგება", — ამბობს თამარ გაბუნია.

მინისტრის მოადგილის ინფორმაციით, ხუთშაბათს, 7 ოქტომბერს გაიმართება იმუნიზაციის საბჭო, სადაც დააზუსტებენ პროგრამის დეტალებს.

დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის, ამირან გამყრელიძის თქმით, მსგავსი სქემა მუშაობდა C ჰეპატიტის სკრინინგის პროგრამაზეც.

"იმის მაგივრად, რომ ჩვენთან მოვიდნენ ასაცრელად ხალხი, ახლა ამცრელები უნდა მივიდნენ მათთან", — განაცხადა ამირან გამყრელიძემ.

მისი თქმით, ეს იქნება კარდაკარის პრინციპის პროცესი, როცა ექიმები თავად მივლენ მოსახლეობასთან და ეცდებიან დაარწმუნონ, რომ აიცრან.

გაიგე მეტი: