ლელოს ლიდერის, მამუკა ხაზარაძის განცხადებით, ახლა მნიშვნელოვანია, რომ ხმები დაიცვან და მეორე ტურებისთვის მოემზადონ. ამის შესახებ მან ეგზიტპოლების შედეგების გამოქვეყნების შემდეგ ისაუბრა.

"ყველა ეგზიტპოლი, რომელიც ახლა გამოჩნდა, მეტყველებს იმაზე, რომ ოპოზიციამ მოიგო არჩევნები თბილისში, იქნება მეორე ტურები. ახლა ძალიან მნიშვნელოვანია, მოვუწოდოთ ჩვენს წარმომადგენლებს ყველა უბანზე, რომ დავიცვათ ხმები და მოვემზადოთ მეორე ტურებისთვის. ეს არის ძალიან მნიშვნელოვანი, რომ ყველაფერი, რაც აქამდე ჩაიდო, ენერგია, ენთუზიაზმი და შრომა, იქნას გაფორმებული სათანადოდ", — განაცხადა მან მთავარ არხთან კომენტარზე.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის თანახმად, მმართველ გუნდის შედეგი თბილისში 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.