2 ოქტომბრის ადგილობრივი თვითმმართველობის არჩევნებზე მედიის განვითარების ფონდი (MDF) დეზინფორმაციის გამოვლენას მოქალაქეების ჩართულობით შეეცდება. მითების დეტექტორმა, რომელიც ფეისბუკის ფაქტების გადამოწმების პროგრამის პარტნიორია, სოციალურ ქსელში კამპანია დაიწყო, რომლითაც მკითხველებს მოუწოდებს, არჩევნებთან დაკავშირებით სოციალური ქსელით გავრცელებული დეზინფორმაციის შესახებ რედაქციას აცნობოს, ან პოტენციურად მცდარი ინფორმაციის შემცველი მასალა Facebook-ზე გაასაჩივროს.

მიღებულ შეტყობინებებს მითების დეტექტორის ანალიტიკოსები ღია წყაროებზე დაყრდნობით, ფაქტების გადამოწმების ინსტუმენტების მეშვეობით შეისწავლიან და ყალბი ცნობების აღმოჩენის შემთხვევაში, ფეისბუკზე პოსტს შესაბამის შეფასებას მიანიჭებენ, რაც საარჩევნო გარემოსთვის საზიანო ინფორმაციის გავრცელებას შეამცირებს.

“ჩვენი ორგანიზაცია უკვე ერთი წელია საქართველოში Facebook-ის ფაქტების გადამოწმების პროგრამის პარტნიორია. მოქალაქეების მიერ გასაჩივრებული ინფორმაცია გვეხმარება, პოტენციურად ყალბ ცნობებზე წვდომა დროულად გვქონდეს, პირდაპირი კომუნიკაცია მოქალაქეებთან კი ამ პროცესს კიდევ უფრო აჩქარებს. საბოლოო ჯამში კი ეს ხელს შეუწყობს საარჩევნო გარემოს დაცვას საზიანო ინფორმაციისგან, რამაც შესაძლოა, ამომრჩეველთა გადაწყვეტილებაზე გავლენა მოახდინოს,” — ამბობს მითების დეტექტორის რედაქტორის მოადგილე ქეთი ხუციშვილი.

მოქალაქეების გარდა, საარჩევნოდ ინფორმაციის გადამოწმებაში მითების დეტექტორის ლაბორატორიის კურსდამთავრებულები და რეგიონული ქსელის წევრებიც აქტიურად ჩაერთვებიან.

“ჩვენი ქსელის წევრები აჭარიდან, კახეთიდან და იმერეთიდან, ასევე ჩვენი მედიაწიგნიერების პროგრამის კურსდამთავრებულები აქტიურად ჩაერთვებიან დეზინფორმაციის იდენტიფიცირების პროცესში და ჩვენს ანალიტიკოსებთან კოორდინირებით მოახდენენ ყალბ ცნობებზე რეაგირებას. მათი ჩართულობა საშუალებას მოგვცემს მყისიერად მოვახდინოთ რეაგირება საქართველოს ნებისმიერ რეგიონში გავრცელებულ საარჩევნო დეზინფორმაციაზე,” — ამბობს MDF-ის მედიაწიგნიერების პროგრამის ხელმძღვანელი მაიკო რატიანი.

საარჩევნო დეზინფორმაციის გამოვლენის შემთხვევაში, მკითხველს შეუძლია რედაქციას ელ. ფოსტის [email protected] ან მითების დეტექტორის Facebook გვერდის მეშვეობით დაუკავშირდეს და მიაწოდოს პოტენციურად ყალბი ინფორმაციის შემცველი ბმულები.

მითების დეტექტორი წინასაარჩევნო გარემოს სოციალურ ქსელებში 2020 წლის საპარლამენტო არჩევნების დროსაც აკვირდებოდა. ვრცლად იხილეთ კვლევა.

დეტალურად თუ როგორ მუშაობს Facebook-ის ფაქტების გადამოწმების პროგრამა, იხილეთ ვიდეოში: