ადამიანის უფლებათა სახლი ლექსო ლაშქარავას სახელობის პრემიას აწესებს. პრემია უფლებადამცველი მედია პროფესიონალებისთვისაა. ორგანიზაცია აცხადებს, რომ ამით სურს 5 ივლისის მოვლენებს გამოეხმაუროს და აღნიშნავს, რომ ხშირად ჟურნალისტები უფლებადამცველები ხდებიან, როდესაც უფლებადარღვევებს აშუქებენ, ზრდიან საზოგადოების ცნობიერებას ადამიანის ძირითადი უფლებებისა და თავისუფლებების შესახებ, რის გამოც ხშირად ძალადობის, შევიწროებისა და მუქარის მსხვერპლი ხდებიან.

"ლექსოს პრემიის დაწესებით გვსურს გამოვეხმაუროთ საქართველოში ბოლოდროინდელ მოვლენებს, განსაკუთრებით, 5 ივლისს, მედიის თავისუფალი და უფლებადაცვითი საქმიანობის წინააღმდეგ განხორციელებულ ზეწოლას და ძალადობას. პრემიის დაწესებით გვინდა, მხარი დავუჭიროთ თავისუფალი მედია გარემოს არსებობას და განვითარებას საქართველოში", — ვკითხულობთ ორგანიზაციის განცხადებაში.

პრემია ორ კატეგორიაში გაიცემა: უფლებადაცვითი რეპორტაჟი და უფლებადაცვითი სტატია. კონკურსში მონაწილეობა 18+ ასაკის ჟურნალისტებს, ოპერატორებსა და სხვა მედია პროფესიონალებს შეეძლებათ. თითოეულ კატეგორიაში გამარჯვებულს ფულადი ჯილდო 2 000 ლარი გადაეცემა. საკონკურსო განაცხადების მიღების ბოლო ვადა: 2021 წლის 31 ოქტომბერია. დამატებითი ინფორმაცია კონკურსის შესახებ იხილეთ აქ.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლისს გარდაიცვალა. ამის გამო, მედიამ იმ დღესვე საპროტესტო აქცია გამართა, რადგან სახელმწიფომ მედიის და გამოხატვის უფლების დაცვა ვერ/არ უზრუნველყო და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა. აღანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.