სახალხო დამცველთან არსებული ტეოლერანტობის ცენტრისა და რელიგიათა საბჭოს წევრი რელიგიური გაერთიანებები გავრცელებულ ჩანაწერებთან დაკავშირებით უკიდურეს პროტესტს გამოხატავენ. მათი განცხადებით, გავრცელებული მასალები შეიძლება მეტყველებდეს მხოლოდ და მხოლოდ იმაზე, რომ ხელისუფლება, უსაფრთხოების სამსახურის მეშვეობით, ჩადიოდა უმძიმეს დანაშაულს ადამიანის, საკუთარი მოქალაქეების, ყველა რელიგიური გაერთიანების, სამოქალაქო საზოგადოების, საქართველოს კონსტიტუციის, საქართველოს სახელმწიფოს დემოკრატიული და სეკულარული წყობის წინააღმდეგ.

"ამავდროულად, გავრცელებული მასალების მიხედვით, შეგვიძლია გამოვიტანოთ დასკვნა, რომ რელიგიური ორგანიზაციების წარმომადგენლებისა და რელიგიის თავისუფლების დამცველების წინააღმდეგ შემუშავებული იყო მათი საქმიანობისა და პირადი ცხოვრების მადისკრედიტირებელი საგანგებო ღონისძიებები.

თავისი შინაარსით უპრეცედენტო და ყოვლისმომცველი ხასიათის ეს უმძიმესი მოვლენა, აგრეთვე გვეუბნება იმის შესახებ, რომ რელიგიური გაერთიანებების წარმომადგენლები და უფლებადამცველები, ყველა ადამიანი, რომელიც უკანონო თვალთვალისა და მოსმენის მსხვერპლი გახდა, თავს საქართველოში ვეღარ იგრძნობს დაცულად და უსაფრთხოდ", — ნათქვამია განცხადებაში.

რელიგიათა საბჭოს წევრების თქმით, მსჯელობენ სამართლებრივ გზებზე, საერთაშორისო მექანიზმებზე, რომელთაც შეიძლება მათი უფლებებისა და თავისუფლების, მათი უსაფრთხოების დასაცავად მიმართონ.

"ასევე, გადაუდებელ აუცილებლობად მიგვაჩნია, რამდენადაც ეს შესაძლებელი იქნება, შეიზღუდოს წვდომა გავრცელებული ფაილების შინაარსზე და სრულად უზრუნველყონ ნებისმიერი პირადი ხასიათის ინფორმაციის დახურვა.

ჩვენ უმკაცრესად ვგმობთ და ვაპროტესტებთ სახელმწიფოს მიერ ადამიანის, უდანაშაულო და კანონმორჩილი მოქალაქეებისა და რელიგიური გაერთიანებების წინააღმდეგ ჩადენილ ტოტალური ხასიათის ბოროტებას!", — ვკითხულობთ განცხადებაში.

განცხადებას ხელს შემდეგი ორგანიზაციები აწერენ:

  • სახალხო დამცველთან არსებული ტოლერანტობის ცენტრი;
  • ქართველ მუსლიმთა კავშირი;
  • სრულიად საქართველოს მუსლიმთა უმაღლესი სასულიერო სამმართველო;
  • ლათინ კათოლიკეთა ამიერკავკასიის სამოციქულო ადმინისტრაცია;
  • ევანგელურ ბაპტისტური ეკლესია;
  • სახარების რწმენის ეკლესია;
  • ხსნის არმია;
  • ევანგელური ეკლესია სიცოცხლის სიტყვა;
  • საქართველოს ევანგელისტური ეკლესია;
  • დახსნილ ქრისტიანთა საღვთო ეკლესია;
  • აჰმადია მუსლიმები გაერთიანება;
  • მეოგბართა საზოგადოება — კვაკერები;
  • სვედენბორგის რელიგიური საზოგადება;
  • ევანგელურ-ლუთერული ეკლესია

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: