სავარაუდოდ, სახელმწიფო უსაფრთხოების სამსახურიდან (სუს) გაჟონილი ინფორმაციით ირკვევა, რომ თბილისის მერი, კახა კალაძე კონსტანტინე მორგოშიას ორგანიზაციას ფინანსურ დახმარებას უწევს.

ჩანაწერების მიხედვით, 2020 წლის 3 აპრილს ძალადობრივი და ჰომოფობიური ქართული მარშის ლიდერმა, სანდრო ბრეგაძემ ძალადობრივი ჯგუფების ერთ-ერთ ლიდერს, პრიმაკოვის ცენტრის ხელმძღვანელს დიმიტრი ლორთქიფანიძეს აცნობა, რომ "მისი და დ.ლორთქიფანიძის საუბარი ისმინება, თუმცა არ მოერიედება იმის აღნიშვნა, რომ კ.მორგოშიას ორგანიზაციას ფინანსურ დახმარებას უწევს ქ.თბილისის მერი კახა კალაძე, რომელმაც კ.მორგოშიას უკანონოდ ორჯერ მისცა მშენებლობის ნებართვა".

ჩანაწერის მიხედვით, სანდრო ბრეგაძე ამბობს, რომ აქვს ამის დამადასტურებელი დოკუმენტაცია და საჭირო დროს გაასაჯაროებს.

"ს.ბრეგაძის განმარტებით, კ.კალაძის ბიძაშვილისგან (ვინაობას არ აკონკრეტებს) შეიტყო, რომ კ.მორგოშიამ "ქართული მარშის" სახელით, მასთან (ბრეგაძესთან) შეუთანხმებლად კ.კალაძეს შეუთვალა, რომ მიწის ფართობების გაყიდვის თაობაზე თუ არ სურს ქ.თბილისის მერიასთან აქციების მოწყობა, ფინანსურად დაეხმაროს "ალტერნატივა საქართველოს", რასაც კ.კალაძე დაეთანხმა", — აღნიშნულია დოკუმენტში.

ამავე ფაილის მიხედვით, ბრეგაძე ამბობს, რომ კონსტანტინე მორგოშიას და ლევან ვასაძეს შედგენილი აქვთ საპარლამენტო არჩევნებში მათი ორგანიზაციის სახელით მონაწილე პირთა სია და პირველ ნომრად დასახელებული იქნება ადვოკატი მარიამ კუბლაშვილი, ხოლო თბილისის ერთ-ერთ რაიონში მაჟორიტარ კანდიდატად კენჭს იყრის გურამ ფალავანდიშვილი. ბრეგაძის თქმით, ხსენებული ორგანიზაციის საარჩევნო კამპანიას დააფინანსებს კახა კალაძე, "ვინაიდან მერმა დახმარების მიზნით მორგოშიას უკვე გადასცა 300 000 დოლარი".

ჩანაწერებში მითითებულია, რომ ეს ინფორმაცია ლორთქიფანიძემ უარყო და თქვა, რომ ფალავანდიშვილი არჩევნებში მონაწილეობას გეგმავს პარტია ქართული იდეის დამფუძნებელ ლევან ჩაჩუასთან ერთად. გურამ ფალავანდიშვილმა ლევან ჩაჩუასთან ერთად პარტია ქართული იდეის სახელით 2020 წლის საპარლამენტო არჩევნებში მონაწილეობა ნამდვილად მიიღო.

გარდა ამისა, სავარაუდოდ, ბრეგაძის თანახმად, მორგოშიამ წერილობით მიმართა თბილისის მერიას, რომ მისი ორგანიზაცია მზად არის, ქვეყანაში შექმნილი მძიმე ეკონომიკური მდგომარეობიდან გამომდინარე, ფინანსური დახმარება გაუწიოს ლგბტ თემის წარმომადგენლებს. აღნიშნული უარყოფითად შეაფასა ლორთქიფანიძემ და განმარტა, რომ საზოგადოებაში მორგოშია ასოცირდება "ეროვნულად მოაზროვნე პირებთან და მის მიერ ლგბტ თემის დახმარება გამოიწვევს ეროვნული იდეოლოგიის მქონე საზოგადოების დაცინვას".

ჩანაწერებში ბრეგაძე ამბობს იმასაც, რომ მორგოშიამ ქართული მარშის სახელით დააშანტაჟა ბიზნესმენი დავით კოდუაც და გამოართვა 50 000 აშშ დოლარი.

ამავე ფაილების მიხედივთ, საუბრის ბოლოს, ბრეგაძემ აღნიშნა, რომ საზღვარგარეთიდან მისმა მეგობრებმა (ვინაობებს არ აკონკრეტებს) აცნობეს, რომ ალტერნატივა საქართველოს დამფუძნებელი არის "ვინმე ემრე ქუჩუკი", რომელიც თურქული სპეცსამსახურების აგენტია. აღსანიშნავია, რომ ემრე ქუჩუკი ღიად პრორუსული, ჰომოფობიური, ქსენოფობიური და სიძულვილის გამავრცელებელი არხის, Alt-Info-ს წარმომადგენელია.

On.ge ჩანაწერებთან დაკავშირებით ესაუბრა სანდრო ბრეგაძეს, რომელიც ამბობს, რომ ლორთქიფანიძესთან მსგავსი საუბარი არ ახსენდება. ძალადობრივი ჯგუფების ერთ-ერთი ლიდერის თქმით, მან, ვინც ეს ჩანაწერები შექმნა, ცრუ ინფორმაცია გაავრცელა.

"დიმიტრი ლორთქიფანიძესთან არ მისაუბრია ძალიან დიდი ხანია, შეიძლება წელიწად-ნახევარი იყოს გასული. მე ყოველშემთხვევაში არ მახსენდება ასეთი საუბარი", — აღნიშნავს ბრეგაძე.

ამასთან დაკავშირებით მცირე კომენტარი გააკეთა კახა კალაძემაც. მისი თქმით, "ეს არის ძალიან დიდი ტყუილი, ძალიან დიდი სიცრუე და ძალიან დიდი სისულელე".

ეს ჩანაწერები ამოღებულია, სავარაუდოდ, სუს-ის თანამშრომლების მიმოწერიდან. ფაილში თავმოყრილის თითქმის ორწლიანი ყოვლდღიური კომუნიკაცია — 2019 წლის 22 მარტიდან 2021 წლის 23 თებერვლის ჩათვლით.

აღსანიშნავია, რომ კონსტანტინე მორგოშია არის ალტერნატიული საქართველოს ხელმძღვანელი და ღიად პრორუსულ, ჰომოფობიურ, ქსენოფობიურ და სიძულვილის გამავრცელებელ არხ Alt-Info-ს წევრი.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: