20 ივნისის ამნისტიის კანონპროექტის მოწინააღმდეგეებს სამართალდამცავებმა პარლამენტის მიმდებარე ტერიტორიაზე, გზის სავალ ნაწილზე სტენსილის გაკეთების უფლება არ მისცეს, რასაც პოლიციასა და ადგილზე შეკრებილებს შორის ხმაური და დაპირისპირება მოჰყვა.

"ინვენტარი რაც გვქონდა ყველაფერი წაგვართვეს და დააზიანეს, მაგრამ სამართლებრივი ბრძოლა გრძელდება, ევროპარლამენტარებთან გვაქვს პირდაპირი კონტაქტი. ეს არის რუსეთის ბრძანება, რომ 20 ივნისის დემონსტრანტები დასაჯონ, რომ ჩვენ არ გვქონდეს არაფრის უფლება", — აცხადებს აქტივისტი, ირაკლი ფავლენიშვილი.

აქციის ორგანიზატორები 19 აპრილის შეთანხმებას "პოლიტიკური ხაფანგს" უწოდებენ და ამბობენ, რომ აქციების შეწყვეტას არ აპირებენ და სამართლებრივი ბძროლას გააგრძელებენ.

"20 ივნისს დაშავებულები, ადამიანები, რომლებიც დავისაჯეთ იმის გამო, რომ დავიცავით ეროვნული ღირსება, შემდგომში ვაცხადებდით, რომ ეს იყო პოილიტიკური ხაფანგი, რომ პოლიტიკური პარტიები და სამოქალაქო ორგანიზაციების ნაწილი გაება ამ ხაფანგში, რომ "ოცნება" არ აპირებდა დემოკრატიულ რეფორმებს. ადამიანებმა თვალები დაგვთხარეს, დაგვაზიანეს და ახლა თურმე პროტესტის უფლება არ გვაქვს", — ამბობს ფავლენიშვილი.

დღეს პარლამენტი მესამე მოსმენით განიხილავს 20 ივნისის საქმეზე ამნისტიას. ამნისტია 19 აპრილის შარლ მიშელის დოკუმენტის ფარგლებში შემუშავდა, რომელსაც ქართულმა ოცნებამ და ოპოზიციის ნაწილმა ხელი მოაწერა. ქართული ოცნება 28 ივლისს შეთანხმებიდან გავიდა და დოკუმენტი ანულირებულად გამოაცხადა.