თალიბანი აცხადებს, რომ ქაბულის აღებიდან 3 კვირაში ავღანეთის ბოლო პროვინცია — პანჯშირიც მათ ხელშია. ამის შესახებ ინფორმაციას Al jazeera ავრცელებს.

"ამ გამარჯვებით ჩვენმა ქვეყანამ საბოლოოდ დააღწია თავი ომის ჭაობს", — განაცხადა თალიბანის მთავარმა სპიკერმა ზაბიჰულა მუჯაჰიდმა 6 სექტემბერს.

ამ ინფორმაციას არ ადასტურებს ანტითალიბანური ეროვნული წინააღმდეგობის ფრონტი (NRF), რომელსაც აჰმად მასუდი ხელმძღვანელობს. მისი წევრია ასევე ქვეყნის ყოფილი ვიცეპრეზიდენტი, ამრულა სალეჰიც, რომელმაც თავი ავღანეთის კანონიერ პრეზიდენტად გამოაცხადა და ქვეყანაში თალიბების მმართველობის დამყარების შემდეგაც დარჩა.

ეროვნული წინააღმდეგობის ფრონტი ამბობდა, რომ დანებებას არ აპირებს და თალიბანის წინააღმდეგ ბრძოლას გააგრძელებს, ხოლო 6 აგვისტოს სოციალურ ქსელში წერდნენ, რომ პანჯშირში მძიმე შეტაკებები დაიწყო და მათმა მებრძოლებმა თალიბანს ოთხივე მხრიდან შეუტიეს. მოგვიანებით, Twitter-ზე ვრცელდებოდა ინფორმაცია, რომ ეს შეტაკება ფრონტის გამარჯვებით დასრულდა. აღნიშნულთან დაკავშირებით მედიებში დაზუსტებული ინფორმაცია ჯერჯეროით არ ვრცელდება.


2021 წლის 14 აპრილს აშშ-ის პრეზიდენტმა ჯო ბაიდენმა განაცხადა, რომ ავღანეთიდან ამერიკული ჯარების გაყვანა პირველ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა ქაბულის აღებაც მალე შეძლო — პრეზიდენტი გაიქცა, თალიბებმა ძალაუფლება მოიპოვეს.

მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ძალაუფლების მიღების შემდეგ თალიბებმა არაერთი ადამიანი მოკლეს და დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

31 აგვისტოს ოფიციალურად დასრულდა ევაკუაციის პროცესი და 20-წლიანი ომის შემდეგ ავღანეთი უკანასკნელმა ამერიკელმა სამხედრომაც დატოვა. ქაბულის აეროპორტს ახლა თალიბები აკონტროლებენ.

გაიგე მეტი: