რუსული სახელმწიფო ელექტროენერგეტიკული ჰოლდინგი "როსსეტი", სანქცირებული აღმასრულებელი დირექტორის ანდრეი რიუმინის ხელმძღვანელობით, საქართველოში სამუშაო ვიზიტით იმყოფებოდა. რუსული დელეგაციის ვიზიტის შესახებ ინფორმაციას კომპანია ავრცელებს.

როგორც რუსული მედია წერს, ვიზიტის დროს შეხვედრა გაიმართა საქართველოს უმსხვილესი ენერგეტიკული კომპანიის, "საქრუსენერგოს" მენეჯმენტთან, რომელის 50%-ს "როსსეტი" ფლობს, 50%-ს — საქართველოს მთავრობა.

"განხილულ იქნა ელექტროქსელების საიმედოობის, მიმდინარე შედეგებისა და საინვესტიციო გეგმების საკითხები. ასევე შეჯამდა 2024 წლის წარმოებისა და ფინანსურ-ეკონომიკური შედეგები", — ნათქვამია განცხადებაში.

"როსეტის" ცნობით, მხარეებმა განიხილეს 500 კვ-იანი ელექტროგადამცემი ხაზის "კავკასიონის" შეუფერხებელი ფუნქციონირება, რომელიც გადის რუსეთისა და საქართველოს ტერიტორიაზე.

როგორც რუსული მედია წერს, "საქართველოს ეკონომიკისა და მდგრადი განვითარების სამინისტროში გაიმართა შეხვედრა, სადაც განიხილეს ელექტროენერგეტიკული ინფრასტრუქტურის მოდერნიზაციასა და მშენებლობასთან დაკავშირებულ ერთობლივ პროექტებში მონაწილეობის შესაძლებლობა".

რუსული დელეგაციის ვიზიტის შესახებ ეკონომიკის სამინისტრომ "პუბლიკას" შემდეგი ინფორმაცია მიაწოდა:

"სს "საქრუსენერგო", რომელიც 1996 წელსაა დაფუძნებული საქართველოსა და რუსეთის მიერ ენერგეტიკის დარგში თანამშრომლობის შესახებ დადებული შეთანხმების საფუძველზე. სააქციო საზოგადოების აქციონერები არიან:

საქართველოს სახელმწიფო, რომლის საკუთრებაშია საზოგადოების აქციათა 50% და რუსეთის ფედერაციის მხრიდან — საჯარო სააქციო საზოგადოება "ერთიანი ენერგეტიკული სისტემის ფედერალური საქსელო კომპანია", რომლის საკუთრებაშია საზოგადოების აქციათა 50%.

"საქრუსენერგო" ფლობს და ექსპლუატაციას უწევს 500, 330 და 220კვ ძაბვის ელექტროგადამცემ ხაზებს, მათ შორის სისტემათაშორის, საქართველოსა და რუსეთის ენერგოსისტემების დამაკავშირებელ 500კვ ეგხ "კავკასიონს", საქართველოსა და აზერბაიჯანის ენერგოსისტემების დამაკავშირებელ 500კვ ეგხ "მუხრანის ველს" და 330კვ ეგხ "გარდაბანს" , საქართველოსა და თურქეთის ენერგოსისტემების დამაკავშირებელ 220კვ ეგხ "აჭარას". ასევე, შიდა სასისტემო 500კვ ელექტროგადამცემ ხაზებს: "იმერეთს", "ქართლი-1-ს" , "ქართლი-2-ს", "მუხრანს" და "ასურეთს".

სააქციო საზოგადოების მართვის უმაღლესი ორგანოა აქციონერთა საერთო კრება, რომელიც, ტრადიციულად, ყოველწლიურად იმართება, რომლის დროსაც მხარეები განიხილავენ კომპანიის საფინანსო მდგომარეობას, ელექტროგადამცემი ინფრასტრუქტურის შემდგომ განვითარებას და სხვა აქტუალურ საკითხებს.

კომპანიაში საქართველოს მხარეს წარმოადგენს საქართველოს ეკონომიკისა და მდგრადი განვითარების სამინისტრო.

ამდენად, აქციონერთა საერთო კრების ფარგლებში, გაიმართა შეხვედრა სამინისტროს ენერგეტიკული პოლიტიკის დეპარტამენტის წარმომადგენლებთან კომპანიასთან დაკავშირებულ საკითხებზე".

რომელი ქვეყნების მიერაა სანქცირებული "როსსეტი" აღმსარულებელი დირექტორი ანდრეი რიუმინი?

ანდრეი რიუმინი ვლადიმირ პუტინთან დაახლოებული ბიზნესმენია და ევროპის რამდენიმე ქვეყნსი მიერაა სანქცირებული. ეხო კავკაზას ინფორმაციით, ის სანქცირებულია ევროკავშირის, გაერთიანებული სამეფოს, შვეიცარიისა და კანადის მიერ.

ანდრეი რიუმინი ევროკავშირის სანქციების სიაში 2022 წლის 15 მარტს, შეზღუდვების მეოთხე პაკეტით შეიყვანეს. მიზეზი მისი, როგორც ეკონომიკის საკვანძო სექტორში "ერთ-ერთი წამყვანი ბიზნესმენის" სტატუსი და 2022 წლის 24 თებერვალს ვლადიმერ პუტინთან "ოლიგარქიულ" შეხვედრაში მონაწილეობაა. ეს უკრაინის სუვერენიტეტის შელახვის პოლიტიკის მხარდაჭერად იქნა მიჩნეული. ევროკავშირის სანქციების ფარგლებში, რიუმინისა და "როსეტის" აქტივები ევროკავშირში გაიყინა, მათთან ნებისმიერი ტრანზაქცია აიკრძალა და თავად რიუმინს ევროკავშირის ქვეყნებში შესვლა აეკრძალა.

დიდმა ბრიტანეთმა რიუმინი სანქციების სიაში იმავე დღეს —2022 წლის 15 მარტს, "როსნეფტის", "იანდექსის" და სხვა კომპანიების ხელმძღვანელებთან ერთად შეიყვანა. ის ე.წ. აქტივების გაყინვის სიაში შეიყვანეს: მისი აქტივები დიდ ბრიტანეთში გაიყინა, ბრიტანულ იურიდიულ და ფიზიკურ პირებს მასთან საქმიანი ურთიერთობა ეკრძალებათ, თავად მას კი ქვეყანაში შესვლა ეკრძალება. მიზეზი ის არის, რომ, ევროკავშირის მსგავსად, ის პუტინთან დაახლოებულ ბიზნესმენად ითვლება სტრატეგიულ სექტორში, რომელიც სახელმწიფოს შემოსავალს მოაქვს.

შვეიცარიამ რიუმინის წინააღმდეგ სანქციები 2022 წლის 16 მარტს დააწესა.

კანადამ რიუმინის წინააღმდეგ სანქციები 2022 წლის 18 მაისს დააწესა. კანადის მთავრობის თქმით, ეს არის პასუხი უკრაინაში "რუსეთის მიერ განხორციელებულ გაუმართლებელ აგრესიაზე" და ღონისძიება "ოლიგარქებისა და მათი გარემოცვის" წინააღმდეგ. სანქციები პუტინთან დაახლოებული სახელმწიფო მენეჯერების, მათ შორის "როსეტის" აღმასრულებელი დირექტორის ანდრეი რიუმინის წინააღმდეგაა მიმართული.