"La Muralla Roja" (ესპანურად —"წითელი კედელი") საცხოვრებელი კომპლექსია, რომელიც ესპანეთის ქალაქ კალპეში მდებარეობს. რიკარგო ბოფილის მიერ შექმნილი ეს უნიკალური შენობა ხმელთაშუაზღვისპირეთის არაბული არქიტექტურითაა შთაგონებული და ტრადიციული არაბული ციხე-სიმაგრის, ქასბას სტრუქტურაზეა დაფუძნებული. შენობის შიდა და გარე ფასადებზე გამოყენებული ხასხასა, ნათელი ფერები შთამბეჭდავ კონტრასტს ქმნის ბუნებასთან და ამავდროულად ხაზს უსვამს მის წმინდა სილამაზეს.

ფოტო: Ricardo Bofill

ციხესიმაგრის ფორმით აგებული პროექტი ისე გამოიყურება, თითქოს კლდოვან ფერდობზე თავისით ამოიზარდა. ქასბა ტრადიციულად ჩრდილოეთ აფრიკის ქვეყნებში გავრცელებული, გალავნით შემოსაზღვრული ციტადელია. "წითელი კედელი" ჩაფიქრებულია, როგორც თანამედროვე ქასბა: გადაჯაჭვული კიბეებით, პლატფორმებითა და ხიდებით, რომლებიც აერთიანებს 50 ბინას.

პროექტის სირთულე ასევე ვლინდება ბინების ტიპოლოგიაში: კომპლექსში არის 60 კვ.მ ფართობის სტუდიოს ტიპის ბინები, 80 კვ.მ-იანი ორსაძინებლიანი ბინები და 120 კვ.მ სამსაძინებლიანი ბინები. არქიტექტორ რიკარდო ბოფილის სურვილი — შეეთავაზებინა "წითელი კედლის" მაცხოვრებლებისთვის გაუმჯობესებული ცხოვრების პირობები — აისახება კომპლექსის სახურავებზე მოწყობილ ტერასებში, მზის აბაზანებში, საცურაო აუზსა და საუნაში, რომლებიც მხოლოდ მაცხოვრებლებისთვის არის განკუთვნილი.

ფოტო: Ricardo Bofill

გარე ფასადზე გამოყენებულია სხვადასხვა ტონის წითელი საღებავი, რაც ლანდშაფტთან კონტრასტს უსვამს ხაზს. გადაადგილების ზონები და კიბეები კი შეღებილია ცისფრის სხვადასხვა ტონებში — ღია ცისფრიდან ლურჯ-იისფრამდე — იმის მიხედვით, უნდა ეწინააღმდეგებოდეს ესა თუ ის პუნქტი გარემოს თუ შეერწყას ცას ვიზუალურად.

ფოტო: Ricardo Bofill

"წითელი კედელი" ყველაზე მეტად ლაბირინთს შეიძლება შევადაროთ, რომელიც აგებულია ზუსტი გეომეტრიული გეგმის მიხედვით — ბერძნული ჯვრის ტიპოლოგიით, რომლის თითოეული მკლავი ხუთი მეტრის სიგრძისაა. ეს ჯვრები კვეთს სერვისული კოშკების ზონას, სადაც განთავსებულია სამზარეულოები და სველი წერტილები.

ფოტო: Ricardo Bofill