მიუხედავად იმისა, რომ საქართველოში ბოლო ორი-სამი კვირის განმავლობაში კოვიდსიტუაცია მძიმეა, ისრაელმა საქართველო ე.წ. წითელი ქვეყნების სიიდან ნარინჯისფერ ჯგუფში დააბრუნა. მიღებული გადაწყვეტილებით, ისრაელის მოქალაქეები კვლავ შეძლებენ საქართველოში მოგზაურობას, თუმცა სამშობლოში დაბრუნების შემდეგ, დაექვემდებარებიან თვითიზოლაციას, ან კარანტინს. ამის შესახებ ინფორმაციას საქართველოში ისრაელის საელჩო ავრცელებს. თუმცა, ისრაელის ჯანდაცვის სამინისტროს ვებგვერდზე, სადაც კოვიდვითარებასთან დაკავშირებით ქვეყნების სტატუსი და რეკომენდაციებია მოცემული, ინფორმაცია ჯერ არ განახლებულა.

"მოხარული ვართ, გაცნობოთ, რომ გუშინ ისრაელის მთავრობამ საქართველო წითელი ქვეყნების ჯგუფიდან ნარინჯისფერ ქვეყნებში გადაიყვანა. რაც იმას ნიშნავს, რომ ისრაელელ ტურისტებს კვლავ შეუძლიათ ამ ულამაზეს ქვეყანაში სტუმრობა, ხოლო დაბრუნებისას ისინი დაექვემდებარებიან თვითიზოლაციას (ან კარანტინს). აღნიშნული გადაწყვეტილება, საქართველოს ახალ კატეგორიაში გადაყვანის თაობაზე, ძალაში შედის 1 სექტემბრიდან", — წერია საელჩოს მიერ გავრცელებულ განცხადებაში.

ისრაელმა საქართველოს ე.წ. წითელი ქვეყნის სტატუსი 23 ივლისს მიანიჭა, ხოლო საკუთარ მოქალაქეებს მოგზაურობა 30 ივლისიდან აუკრძალა.

მაშინ ისრაელის საელჩო საქართველოში აცხადებდა, რომ გადაწყვეტილება პერიოდულად გადაიხედებოდა, რაც ვირუსის გავრცელებაზე იქნებოდა დამოკიდებული.

ისრაელს აქვს ყვითელი — უსაფრთხო, ნარინჯისფერი — რისკის შემცველი და წითელი — მაღალი კოვიდრისკის მქონე ქვეყნების სიები, რომლებთანაც მოგზაურობა შესაბამისად დაშვებული ან შეზღუდულია. სიები ყოველ კვირა კოვიდსიტუაციიდან გამომდინარე ახლდება. ისრაელის ჯანდაცვის სამინისტროს გადაწყვეტილებით, ისრაელის მოქალაქეებმა და ქვეყანაში მუდმივმა მაცხოვრებლებმა, რომელთაც სურთ COVID-19 ინფიცირების ყველაზე მაღალი რისკის მქონე ქვეყნებში გამგზავრება, ნებართვა უნდა აიღონ გამონაკლისების კომიტეტისგან, რომელიც ნებართვას ინდივიდუალური ქეისის საჭიროებების შესწავლის საფუძველზე გასცემს. ამასთან, ყველა იმ მგზავრისთვის, ვინც ისრაელში ამ მაღალი რისკის ქვეყნებიდან ჩადის, სავალდებულია იზოლაცია, მათ შორის გამოჯანმრთელებული და ვაქცინირებული პირებისთვის.

24 აგვისტოს მონაცემებით, საქართველოში კორონავირუსის 5 924 ახალი შემთხვევა დადასტურდა, გამოჯანმრთელდა 4 777, ხოლო გარდაიცვალა — 60 ადამიანი. პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 523 022-ს, სულ გამოჯანმრთელდა 458 265 ადამიანი, ხოლო ვირუსს ჯამში ემსხვერპლა 6 891 პირი.