ლგბტქ+ ფილმები იშვიათობაა, ფილმებში სწორად წარმოჩენილი ქვიარ პერსონაჟები კი — უფრო მეტად. დიდი ხნის განმავლობაში, ლგბტქ+ ადამიანები კინოსა და ტელევიზიაში სტერეოტიპულად აღიქმებოდნენ.

თუ ამერიკაში ჰომოსექსუალობის ჩვენებას ფილმებში 100 წლის წინ კრძალავდა ჰეისის კოდექსი, რუსეთსა და საქართველოში მსგავსი რეგულაციები დღეს მოქმედებს. საქართველოში ეს კანონმდებლობა 2024 წელს მიიღეს და ის პირდაპირ ითვალისწინებს აკრძალვას ისეთი შინაარსის მიმართ, რომელიც "არატრადიციულ სექსუალურ ურთიერთობებს" ასახავს. ამგვარი მიდგომა აცენზურებს ფილმებს, წიგნებს, რეკლამებს, საგანმანათლებლო მასალებსა და ნებისმიერ გამოხატვას, რომელიც ლგბტქ+ თემის არსებობას ხილულს ხდის. ამავდროულად, მსოფლიოს არაერთ ქვეყანაში ლგბტქ+ ადამიანები ცხოვრობენ მძიმე და უთანასწორო პირობებში — ჩაგვრის, მალვისა და რეპრესიული პოლიტიკის ფონზე, რომელიც მათ ნარატივს, ისტორიას და კულტურულ მონაწილეობას მიზანმიმართულად აქრობს.

მარგინალიზებული ჯგუფებისთვის მათი იდენტობის სწორად წარმოჩენა ფილმებში სიცოცხლის გადარჩენის ტოლფასიც კია. დღევანდელ მღელვარე პოლიტიკურ სიტუაციაში აუცილებელია, რომ ადამიანებმა ნახონ სწორად წარმოჩენილი ლგბტქ+ პერსონაჟები ფილმებში — იდეალურ შემთხვევაში კი მსგავსი ფილმები გადაღებული უნდა იყოს იმ ადამიანების მიერ, რომლებმაც დანამდვილებით იციან, როგორია ქვიარ ადამიანების ცხოვრება.

მიუხედავად იმისა, რომ სრული ინკლუზიურობისგან და სტერეოტიპული დამოკიდებულებების აღმოფხვრისგან ჯერ კიდევ შორს ვართ, კინოინდუსტრიამ მაინც დიდი წინსვლა განიცადა ბოლო დროის ლგბტქ+ პერსონაჟების კუთხით. უფრო მეტ ქვიარ კინორეჟისორს, მსახიობს და პროდიუსერს მიეცა საშუალება, გაეზიარებინათ თავიანთი ისტორიები სხვებისათვის და შეგვიძლია იმედი ვიქონიოთ, რომ მომავალში უფრო და უფრო მეტად საინტერესო და შესანიშნავ ლგბტქ+ ფილმებს ვიხილავთ. იქამდე კი წარმოგიდგენთ 10 ლგბტქ+ თემის ფილმს, ისტორიული რომანიდან დაწყებული მარტივი და რომანტიკული, სახალისო კომედიით დამთავრებული.

Happiest Season (2020)

ბევრმა ადამიანმა ეს ფილმი პირველ სადღესასწაულო ქვიარ ფილმად შეაფასა. ფილმის მთავარი გმირი ები (კრისტენ სტიუარტი) გეგმავს თავისი შეყვარებულის, ჰარპერის (მაკენზი დევისი) ხელის თხოვნას, როდესაც ჰარპერს ის საკუთარ ოჯახთან შესახვედრად შობის დღესასწაულზე მიჰყავს. ები აღმოაჩენს, რომ ჰარპერის მშობლებმა მათი ურთიერთობის შესახებ არაფერი იციან, რაც ყველაფერს აფუჭებს.

ფილმის ნახვა შეგიძლიათ Hulu-ზე.

Rent (2005)

ეს კლასიკური ფილმი მიუზიკლად დაიწყო. ის 1990-იან წლებში ნიუ-იორკელი ახალგაზრდა ადამიანების ცხოვრებას მოგვითხრობს. მაშინ, როდესაც შიდსის ეპიდემია წაუშლელ კვალს ტოვებდა საზოგადოებაზე, ორი მეგობარი იბრძვის გადასარჩენად, ნელ-ნელა უყვარდებათ ერთმანეთი და ცდილობენ ქირის გადახდას. ფილმში ისეთი ცნობილი სახეები მონაწილეობენ, როგორებიც არიან ტეი დიგსი, ადამ პასკალი და უილსონ ჯერმეინ ჰერედია.

ფილმის ნახვა შეგიძლიათ Apple TV-ზე.

Blue Is The Warmest Color (2013)

თუ მეგობრისთვის ოდესმე ქვიარ ფილმის რეკომენდაცია გიკითხავთ, უმეტეს შემთხვევაში პასუხი ალბათ Blue Is The Warmest Color იყო. ფრანგული ფილმი მოზარდ გოგონაზე, ადელზე მოგვითხრობს, რომელსაც მასზე უფროსი, ხელოვნების სკოლის სტუდენტი ემა შეუყვარდება. ქალებს შორის ურთიერთობათა უმეტესობის მსგავსად, ფილმი სავსეა გულისტკივილით, ვნებით, კარგი და ცუდი მომენტებით.

ფილმის ნახვა შეგიძლიათ Apple TV-ზე.

Love, Simon (2018)

ალბათ ბევრი ადამიანი გაიზარდა 80-იანი წლების კლასიკური სასკოლო რომანტიკული კომედიებით, როგორებიცაა Pretty In Pink თუ Sixteen Candles. თუკი თქვენ ჯონ ჰიუზის ფილმების მიმართ სიყვარულით გამოირჩევით, მაშინ არც სიყვარულით, საიმონი გაგიცრუებთ იმედებს. რომანზე დაფუძნებული ფილმი ნათლად ასახავს, როგორია სკოლის პერიოდში საკუთარი თავის და იდენტობის ღიად წარმოჩენა. რა თქმა უნდა, შეიძლება ლიბერალური ოჯახის წევრი იყო, სადაც იცი, რომ აუცილებლად მიგიღებენ და მხარს დაგიჭერენ, თუმცა საკუთარი იდენტობის გამოაშკარავება მაინც რთული პროცესია. ფილმში ერთ-ერთ მთავარ სასიყვარულო სუბიექტს ქვიარ მსახიობი თამაშობს, ხოლო ფილმის რეჟისორი კი ჰომოსექსუალია.

ფილმის ნახვა შეგიძლიათ Apple TV-ზე.

Crush (2022)

როდესაც პეიჯ ევანსი მძლეოსნობის გუნდს უერთდება, რათა თავის რომანტიკულ ინტერესს დაუახლოვდეს, ის არ მოელის იმას, რომ საკუთარ თანაგუნდელს, ეიჯეი კამპოსს შეუყვარდება. რა არის ყველაზე საინტერესო ნაწილი? ეიჯეი პეიჯის რომანტიკული ინტერესის ტყუპი დაა და როდესაც პეიჯი ხვდება, რომ შესაძლოა მისდამი გრძნობები ჰქონდეს, მან უნდა გადაწყვიტოს, რომელ დასთან ჰქონდეს ურთიერთობა.

ფილმის ნახვა შეგიძლიათ Hulu-ზე.

Desert Hearts (1985)

Desert Hearts მსოფლიოს მასშტაბით აღიარებულია, როგორც პირველი ლესბოსელური სიუჟეტის მქონე ფილმი. ფილმი აღსანიშნავია ქალთა შორის ურთიერთობის პოზიტიური ასახვით. დონა დეიჩის მიერ გადაღებული ფილმი მოგვითხრობს ვივიანის, 30 წლის პროფესორის შესახებ, რომელიც ნევადის შტატ ქალაქ რენოში ცხოვრობს. აქ ის ერთ-ერთ კაზინოში მომუშავე ახალგაზრდა მხატვარ კეის შეუყვარდება და მათ შორის ტურბულენტური რომანი იწყება.

ფილმის ნახვა შეგიძლიათ Max-სა და Apple TV-ზე.

Tangerine (2015)

მანდარინმა ტრანსგენდერი პერსონაჟების განსახიერების გამო კრიტიკოსების დიდი მოწონება დაიმსახურა. ჰოლივუდში მიმდინარე მოქმედება სექსმუშაკებს შორის მეგობრობაზე მოგვითხრობს, რომელთა როლებსაც მია ტეილორი და კიტანა კიკი როდრიგესი ასრულებენ. ფილმი ფეთქებადი, მძიმე და მკვეთრი ხასიათით გამოირჩევა. ტრანსგენდერ მამაკაცებზე ან ქალებზე ფილმის, მითუმეტეს კარგი ფილმის პოვნა კიდევ უფრო რთულია — მაგრამ ისეთი ფილმის პოვნა, რომელიც ავთენტურია და ტრანსგენდერი მსახიობები ტრანსგენდერ პერსონაჟებს ასახიერებენ, უდიდესი იშვიათობაა. ტრანსგენდერი ადამიანები ჰოლივუდში არასაკმარისად არიან წარმოჩენილნი, მაგრამ ისეთი ფილმების წყალობით, როგორიცაა მანდარინი, ეს საბოლოოდ იცვლება. და აი, კიდევ ერთიი საინტერესო ფაქტი: ეს ფილმი მთლიანად iPhone 5s-ით არის გადაღებული.

ფილმის ნახვა შეგიძლიათ Max-სა და Apple TV-ზე.

Milk (2008)

გას ვან სენტმა გადაიღო ფილმი მილკი, რომელიც გეი უფლებების დამცველისა და პოლიტიკოსის, ჰარვი მილკის ცხოვრებაზეა დაფუძნებული. მილკი, პირველი ღიად ჰომოსექსუალი მამაკაცი, რომელიც კალიფორნიაში საჯარო თანამდებობაზე 1977 წელს აირჩიეს, ჰომოსექსუალობის ერთგვარი ხატი იყო და დღესაც არის. ფილმი მის ცხოვრებას, რომანტიკულ ურთიერთობებს, პოლიტიკურ აღმავლობას და საბოლოოდ მკვლელობას მოგვითხრობს. მილკმა ორი ოსკარი მოიპოვა — ერთი საუკეთესო მთავარი როლის შემსრულებელი მსახიობი მამაკაცისთვის (შონ პენი) და მეორე საუკეთესო ორიგინალური სცენარისთვის (დასტინ ლენს ბლეკის მიერ). ეს ფილმი ნამდვილი ლეგენდაა.

ფილმის ნახვა შეგიძლიათ Max-სა და Apple TV-ზე.

Brokeback Mountain (2005)

თუ შევეხებით კრიტიკოსების მიერ აღიარებულ, ოსკაროსან ფილმებს, Brokeback Mountain კარგი საწყისი წერტილია. მიუხედავად იმისა, რომ ფილმში ლგბტქ+ მსახიობები და გადამღები ჯგუფი არ არის წარმოდგენილი, მან კონსერვატიული საზღვრები გაარღვია და ბარიერები დაამსხვრია, რითაც ის ლგბტქ+ კინემატოგრაფიის გავლენიან ფილმად იქცა. სიუჟეტი მოგვითხრობს ჯეკ ტვისტსა (ჯეიკ ჯილენჰოლი) და ენის დელ მარზე (ჰით ლეჯერი). ორი ქოვბოის ისტორიაზე, რომლებიც 1960-იანი წლების დასაწყისში ხვდებიან ერთმანეთს და ერთმანეთი უყვარდებათ — და რომლებსაც საზოგადოება ჯვარს აცვამდა, თუ ისინი თავიანთ სიყვარულს გამოააშკარავებდნენ. სირცხვილის გრძნობა, რომელსაც ეს ორი პერსონაჟი განიცდის ერთმანეთს შორის არსებული სიყვარულის გამო, დიდ ემოციურ სტრესში გამყოფებთ, თუმცა, ფილმი ძალიან კარგად არის გაწერილი, თავისი იდეალური შესრულებით, გადაღებით და მუსიკით.

ფილმის ნახვა შეგიძლიათ Apple TV-ზე.