ქაბულის აეროპორტი, რომელიც ფაქტობრივად ერთადერთი ადგილი იყო დარჩენილი, რომელსაც თალიბანი არ აკონტროლებდა, დღის ბოლოს მათ ხელში გადავიდა. ამის შესახებ ინორმაციას BBC ავღანეთის საავიაციო უწყებაზე დაყრდნობით ავრცელებს.

საავიაციო უწყებამ განაცხადა, რომ ქვეყნის საჰაერო სივრცე "შეიარაღებულებს გადაეცა" და კომერციულ ავიაკომპანიებს ურჩია, ფრენები გადაეტანათ.

ავღანეთიდან ხალხის ევაკუაციის დასახმარებლად გაგზავნილი თვითმფრინავებს უკვე სხვა ქალაქების აეროპორტების გამოყენება მოუწევთ, რადგან ქაბულის აეროპორტში, როგორც BBC იუწყება, სრული ქაოსია.

ორი ჩეხური სამხედრო თვითმფრინავი უკვე გადაიყვანეს ბაჯუში, აზერბაიჯანის და გერმანიის საევაკუაციო თვითმფრინავი კი იძულებული გახდა, კურსი შეეცვალა კურსი და უზბეკეთში დაშვებულიყო.

რაც შეეხება სხვა ქვეყნების საევაკუაციო თვითმფრინავებს, ჯეჯერობით უცნობია, საიდან და როდის განახორციელებენ ფრენებს.

Aljazeera-ს ინფორმაციით კი, თალიბანმა დაბლოკა ქაბულის აეროპორტი, რადგან ავღანელები ქვეყნიდან გაქცევას ცდილობენ.

აღსანიშნავია, რომ დღეს, 16 აგვისტოს, ნიუ იორკში გამართულ გაეროს უშიშროების საბჭოს საგანგებო სხდომაზე გაეროს გენმდივანმა, ანტონიო გუტიარეშმა, თალიბებს მოუწოდა, გამოავლინონ "მაქსიმალური თავშეკავება სიცოცხლის დასაცავად" და მოითხოვა, რომ ყველას, ვისაც სურს დატოვოს ქვეყანა, უნდა შეძლოს ამის გაკეთება.

თალიბანმა ავღანეთის დედაქალაქი ქაბულიც აიღო და განაცხადა, რომ "ომი დასრულდა". გუშინ, 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ.

თავდაპირველად თალიბები ამბობდნენ, რომ ქალაქის ბრძოლით აღება და სისხლისღვრა არ სურთ, მხოლოდ შესასვლელთან გამაგრდებიან და ხელისუფლების მშვიდობიანად გადაბარებისთვის მოემზადებიან, თუმცა მოგვიანებით რამდენიმე დასახლებაში შევიდნენ — ქალაქში ისმოდა სროლის ხმა, არიან დაშავებულები. თალიბების მტკიცებით, ეს იმიტომ გააკეთეს, რომ პოლიციამ და მთავრობამ ქალაქი დატოვა და "წესრიგის უზრუნველყოფა" იყო საჭირო.

გუშინ დილიდანვე პრობლემურ საკითხად იქცა დიპლომატიური კორპუსის წარმომადგენლებისა და უცხო ქვეყნის მოქალაქეების უსაფრთხოდ გაყვანა. აშშ-მ საელჩოს თანამშრომლების ევაკუაცია თალიბების მისვლისთანავე დაიწყო. ისინი ვერტმფრენით გადაიყვანეს ქაბულის აეროპორტში. ამავე აეროპორტიდან ახორციელებდნენ ევაკუაციას სხვა ქვეყნებიც. რამდენიმე საათში აეროპორტს ათასობით ადამიანი მიადგა, რომელსაც ავღანეთიდან გაქცევა სურდა — ისინი თვითმფრინავში შეჭრას ცდილობდნენ, აეროპორტში ამ დრომდე უკონტროლო სიტუაციაა.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი და ჩინეთია, რომლებიც ამბობენ, რომ მუშაობას აგრძელებენ.

ქაბულში დილა თალიბანის მმართველობის ქვეშ გათენდა. ქუჩებს შეიარაღებული დაჯგუფებები აკონტროლებენ.