პრეზიდენტი სალომე ზურაბიშვილი ამბობს, რომ ქართულ ოცნებას დოკუმენტის ხელმოწერამდე უნდა ეფიქრა, რა იყო მისაღები საზოგადოებისთვის და რა არა. ასე ეხმაურება ის მმართველი გუნდის არგუმენტს იმის შესახებ, რომ შეთანხმების ცალმხრივად შესრულებას მხარდამჭერები არ აპატიებდნენ. გარდა ამისა, ზურაბიშვილი ამბობს, რომ მისთვის უცნაურია, რატომ მოაწერა "ოცნებამ" ხელი დოკუმენტს 43%-იანი ბარიერის შესახებ მაშინ, როცა პირველ დოკუმენტზე, სადაც ეს პირობა არ იყო, არ მოუწერია.

იმედის წამყვანის კითხვაზე, რატომ არ არის "წონიანი ან საფუძვლიანი" მმართველი გუნდის არგუმენტი, რომ შეთანხმების ცალმხრივად შესრულებას საზოგადოება ვერ გაუგებდა, ზურაბიშვილი პასუხობს:

"ალბათ, ადრე უნდა ეფიქრათ იმაზე, რა იყო მისაღები და რა არ იყო მისაღები საზოგადოებისთვის. საერთოდ, ერთი პუნქტი არის, რომელიც ჩვენთვის და მე ნათქვამი მქონდა კიდევაც, ჩემთვის გაუგებარია, მაგრამ არსებობს დანარჩენი საზოგადოებაც და პარტიებიც, ეს არის 43%-იანი ბარიერი, თუ საკითხი საერთოდ"

ზურაბიშვილი იმეორებს, რომ საპარლამენტო არჩევნები ლეგიტიმურად შედგა და დარღვევები ყველგან ხდება. მისი თქმით, არ შეიძლება ლეგიტიმური არჩევნების შედეგი დააყენო კითხვის ნიშნის ქვეშ და გახადო აუცილებელი ახალი დადასტურება.

"მე არაფერს არ უნდა ვამბობდე დოკუმენტის შინაარსზე, მაგრამ იყო პირველი ვერსია დოკუმენტის, რომელიც არ გულისხმობდა ამ 43%-იან ბარიერს და არ მოაწერა ხელი მმართველმა პარტიამ და შემდეგ მოაწერა ამ 43%-იან დოკუმენტს. მე კითხვას ვსვამ ცხადია", — განაცხადა მან.

28 ივლისს შეთანხმების ანულირებაზე საუბრისას ირაკლი კობახიძემ თქვა, რომ საერთაშორისო პარტნიორები ოპოზიციისგან მკაცრად არ ითხოვენ შეთანხმების შესრულებას. მისი თქმით, ამ შეთანხმების "ცალმხრივი ერთგულება" ქართული ოცნებისთვის შეურაცხმყოფელია და "ამგვარ უპრინციპობას ამომრჩეველი არ აატიებდათ". მისივე თქმით, ვითარებაში მისი ამოწურულად გამოცხადება უალტერნატივო ნაბიჯად ესახებათ.

3 აგვისტოს პრეზიდენტმა განაცხადა, რომ არ ეთანხმება მმართველი პარტიის არგუმენტებს, რითიც მათ ანულირება გაამართლეს. ზურაბიშვილი თქვა ისიც, რომ თავად წითელი ხაზების გავლება ხელმოწერამდე იცის, რითიც მიანიშნა ხელმომწერ პარტიებს, რომ ამაზე შეთანხმებამდე უნდა ეფიქრათ.

გარდა ამისა, ზურაბიშვილმა სიტყვით გამოსვლისას კიდევ ერთხელ გაუსვა ხაზი შეთანხმების შესრულების აუცილებლობას და მმართველი გუნდის წევრები და ოპოზიცის ნაწილი გააკრიტიკა. მან განაცხადა, რომ ჩვენ მოვითხოვთ უცხოეთისგან პატივისცემას და გვაღიზიანებს მათი მითითებები და კრიტიკა, თუმცა იმისთვის რომ პატივისცემა დავიმსახჯუროთ, სიტყვას პატივი უნდა ვცეთ და ნაკისრი ვალდებულებები შევასრულოთ.