პრეზიდენტის თქმით, არ ეთანხმება არ იზიარებს მმართველი გუნდის შეფასებას, რითიც დოკუმენტის ანულირებას ხსნიან — თითქოს, პოლარიზაცია არ შემცირებულა. ამავდროულად, ზურაბიშვილი ამბობს, რომ იზიარებს შეთანხმების ხელმომწერი და პარლამენტში შესული პარტიების მიდგომას იმის შესახებ, რომ დოკუმენტმა თავისი პირველადი ფუნქცია შეასრულა.

"ამ დოკუმენტის შედეგია, რომ გარკვეულმა ოპოზიციურმა ძალებმა ქუჩაში ვერ გადაიტანეს პოლიტიკური პროცესები, დაკარგეს დესტაბილიზაციის ყოველგვარი რესურსი და ხელის არ მოწერით განიცადეს ერთგვარი მარგინალიზაცია! ამდენად, არ ვეთანხმები მმართველი პარტიის შეფასებას, რომ პოლარიზაცია არ შემცირებულა, რითაც ხსნის დოკუმენტის ანულირებას. დოკუმენტი ამ პოლარიზაციას ამცირებს, ასუსტებს და დარწმუნებული ვარ, რომ ეს პროცესი, ყველაფრის მიუხედავად გაგრძელდება. ეს არის უალტერნატივო გზა, სტაბილურობისა და დამოუკიდებლობის გამყარებისაკენ, რომელიც ჩვენი ქვეყნის საზოგადოებამ აირჩია", — განაცხადა მან.

ზურაბიშვილის განცხადებით, შარლ მიშელის შეთანხმების მიღწევაში შეტანილი წვლილით ამაყობს, თუმცა არ აიღებს პასუხისმგებლობას მუხლებზე, რომლებზეც მხარეები შეთანხმდნენ და არც დოკუმენტის ანულირებაზე. მისი თქმით, გაუგებარია პოსტფაქტუმ იმის აღმოჩენა, რომ შეთანხმების მუხლები მიუღებელი და ქვეყნისთვის დამაზიანებელი იყო.

ზურაბიშვილი ამბობს იმასაც, რომ თავად წითელი ხაზების გავლება ხელმოწერამდე იცის, რითიც მიანიშნებს ხელმომწერ პარტიებს, რომ ამაზე შეთანხმებამდე უნდა ეფიქრათ. სავარაუდოა, რომ პრეზიდენტმა ამ ფორმით გააკრიტიკა მმართველი გუნდის წევრები, რომლებმაც შეთანხმება ანულირებულად გამოაცხადეს.

გარდა ამისა, ზურაბიშვილმა სიტყვით გამოსვლისას კიდევ ერთხელ გაუსვა ხაზი შეთანხმების შესრულების აუცილებლობას და მმართველი გუნდის წევრები და ოპოზიცის ნაწილი გააკრიტიკა. მან განაცხადა, რომ ჩვენ მოვითხოვთ უცხოეთისგან პატივისცემას და გვაღიზიანებს მათი მითითებები და კრიტიკა, თუმცა იმისთვის რომ პატივისცემა დავიმსახჯუროთ, სიტყვას პატივი უნდა ვცეთ და ნაკისრი ვალდებულებები შევასრულოთ.