საქართველოს პარლამენტის წევრი, შალვა პაპუაშვილი სამართლიანი არჩევნების (ISFED) მიერ გამოქვეყნებულ ადგილობრივი თვითმმართველობის არჩევნების არაოფიციალური კამპანიის მონიტორინგის ანგარიშს "იმანამასუთხრაზე" დაფუძნებულს უწოდებს და ამბობს, რომ არ უკვირს, რადგან "მგონი ეს უკვე ამ ორგანიზაციის სტანდარტად იქცა".

"მაგრამ, ამ მოლოდინსაც კი გადააჭარბა პარლამენტის საგამოძიებო კომისიის თავმჯდომარის მხრიდან, რომელმაც სამართლიანი არჩევნების მიერ უბნების 8%-ზე ბიულეტენების მეტობის მტკიცების სიყალბე დოკუმენტურად დაამტკიცა, სამართლიანი არჩევნების "დაბალი სტანდარტის მქონე" სადამკვირვებლო ორგანიზაციად მოხსენიების წარმოჩენა, როგორც ამ ორგანიზაციაზე "ზეწოლა". ანუ, რა ვქნათ ახლა, ორგანიზაციაზე, რომელიც ერთი თვე პარალელური დათვლის ნამდვილ შედეგებს უმალავდა საზოგადოებას და რვა თვე მეტობით ოქმების სიას, უბოდიშოდ კრიტიკული აზრის გამოთქმაც აკრძალულია? საინტერესოა, ზოგს კრიტიკა ცალკარა რომ ჰგონია”, — წერს შალვა პაპუაშვილი Facebook-ზე.

სამართლიანი არჩევნების (ISFED) 2021 წლის ადგილობრივი თვითმმართველობის არჩევნების არაოფიციალური წინასაარჩევნო კამპანიის დროს სხვადასხვა დარღვევები გამოავლინა. ორგანიზაციის დაკვირვებით, საანგარიშო პერიოდში გამოვლინდა:

  • სამართლიანი არჩევნების დამკვირვებლებზე ზეწოლის 2 შემთხვევა;
  • სამსახურიდან სავარაუდოდ პოლიტიკური ნიშნით გათავისუფლების/წასვლის იძულების — 7;
  • სავარაუდოდ პოლიტიკური ნიშნით ზეწოლის/მუქარის/ხელის შეშლის — 2;
  • სავარაუდოდ საარჩევნო მიზნით განხორციელებული დახმარების აქციების — 2;
  • ადმინისტრაციული რესურსის სავარაუდო გამოყენების — 4;
  • მმართველი პარტიის კანდიდატების არაოფიციალური კამპანიის — 4;
  • ქალი პოლიტიკოსების წინააღმდეგ მიმართული დისკრიმინაციისა და ძალადობის 5 შემთხვევა.

2021 წლის ადგილობრივი თვითმმართველობის არჩევნები 2 ოქტომბერს გაიმართება.