ჰომოფობიურ და ძალადობრივ Alt Info-ს ტელეგრამ არხზე აიისას დამფუძნებელ ანანია გაჩეჩილაძეს ემუქრებიან. ძალადობრივი ქმედების ამსახველი კომენტარები პრორუსული Alt Info-ს ტელეგრამ არხზე გავრცელდა, სადაც მათ ანანია გაჩეჩილაძის ადგილმდებარეობა მიუთითეს და წევრებს მოუწოდებენ "ვინც ხართ, თქვენ იცით".

ანანია გაჩეჩილაძე On.ge-სთან ამბობს, რომ გავრცელებული მიმოწერა არ უკვირს და მას 5-6 ივლისს მომხდარი ძალადობის გაგრძელებად აფასებს.

"არ მიკვირს, 5-6 ივლისის გაგრძელებაა ცალსახად. სტრასბურგში ჩემი გამარჯვებაც ეტყობა ყელში გაეჩხირათ. აქამდეც ყოფილა, ძალიან ხშირად ქუჩაში ამდევნებიან", — ამბობს გაჩეჩილაძე.

მისივე თქმით, გავრცელებული მიმოწერა პირდაპირი სახის მუქარას შეიცავს და პოლიციისთვის მიმართვას აპირებს.

"ერთ საათში, დაახლოებით, მივალ პოლიციაში. რაღაც სახით ფოტოებით იდენტიფიცრება შესაძლებელია და შინაგან საქმეთა სამინისტროს მიმართ ეგ მოთხოვნა მაქვს, რომ დააინდეტიფიცირონ ის პირები აუცილებლად", — აცხადებს ის.

ძალადობრივი და ჰომოფობიური მედია Alt Info ირწმუნება, რომ მუქარის შემცველ კომენტართან ალტ ინფოს ადმინისტრაციას არანაირი კავშირი არ აქვს.

"აღნიშნული ტელეგრამ არხი ღიაა აუდიტორიისთვის და იქ ვიდეოების ქვეშ შეიძლება დააკომენტაროს ნებისმიერმა მომხმარებელმა, ნებისმიერი მის მიერ არჩეული ნამდვილი ან ყალბი სახელით და იქ კომენტარებს ალტ ინფო ისევე ვერ აკონტროლებს, როგორც ფეისბუქზე ან იუთუბზე განთავსებული ვიდეოების ქვეშ მომხმარებლების მიერ დატოვებულ კომენტარებს", — ნათქვამია ძალადობრივი არხის განცხადებაში.

On.ge შინაგან საქმეთა სამინისტროსაც დაუკავშირდა. მათ პასუხს მიღებისთანავე შემოგთავაზებთ.

22 ივლისს აიისამ სტრასბურგის სასამართლოში საქართველოს წინააღმდეგ დავა მოიგო. GDI-ის ცნობით, რომელიც ანანია გაჩეჩილაძის ინტერესებს იცავდა, ადამიანის უფლებათა ევროპულმა სასამართლომ საქმეზე — გაჩეჩილაძე საქართველოს წინააღმდეგ კონვენციის მე-10 მუხლის დარღვევა დაადგინა.

აიისას საქმე

არაეთიკური რეკლამის მიზეზით კომპანიის მფლობელი, ანანია გაჩეჩილაძე სასამართლომ 500 ლარით დააჯარიმა.

როგორც საქალაქო, ასევე სააპელაციო სასამართლოს შეფასებით, არაეთიკური იყო აიისას პროდუქციაზე წარმოდგენილი შემდეგი წარწერები და გამოსახულებები: პროდუქტზე დატანილი წარწერა "ჩამოვკრავდი მაგრამ ნათლისღებაა"; წარწერა "ძლევაი საკვირველი" და გამოსახულება — დიდგორის ბრძოლა; წარწერა "სამეფო კარი თამარში" და თამარ მეფის გამოსახულება; პროდუქტზე დატანილი ვიზუალი — ქალის მარცხენა ხელის გამოსახულება პრეზერვატივით, რაც სასამართლომ "მაკურთხებელ მარჯვენად" შერაცხა.

სასამართლომ აღნიშნა, რომ ზემოხსენებული წარწერებისა და გამოსახულებების სექსუალური ხასიათის პროდუქტთან ერთად წარმოჩენა ხელყოფდა საჯარო მორალს და საზოგადოებაში დამკვიდრებულ ზნეობრივ წარმოდგენებს. პროდუქციის ნაწილზე დატანილი წარწერების მიზანი კი, თბილისის მერიის ზედამხედველობის სამსახურისა და ორივე ინსტანციის სასამართლოს შეფასებით, მორწმუნეთა რელიგიური გრძნობების მიმართ შეურაცხმყოფელი პათეტიკის წარმოდგენა და აშკარა, პირდაპირი და განზრახი დაცინვა იყო.