რესპუბლიკური პარტიის თავმჯდომარის, დეპუტატი ხათუნა სამნიძის თქმით, დღევანდელი პლენარული სხდომა ადასტურებს, რომ ქართულ ოცნებას არ სურდა შინაგან საქმეთა მინისტრისთვის კრიტიკული კითხვები დაესვათ. მან ჟურნალისტების საპროტესტო ბანერზე გაამახვილა ყურადღება და აღნიშნა, რომ მსგავსი პროტესტის გამო ვახტანგ გომელაურის მოსმენა გადაიდო, მაშინ, როცა ფინანსთა მინისტრის მოადგილის, გიორგი კაკაურიძის მოსმენა ჩვეულ ფორმატში გრძელდება.

"ამ პროტესტის ფონზე, მახსოვს, შინაგან საქმეთა მინისტრი აღარ დარჩა და გაიქცა და კითხვებს პასუხი არ გასცა. ზუსტად იგივე ვითარებაა, ზუსტად იგივე გზავნილია, მაგრამ, თურმე ბიუჯეტზე ლაპარაკი შეიძლება. ცოტა თანმიმდევრულები რომ ვიყოთ, თუ შეიძლება კოლეგებო. ეს კიდევ ერთხელ ადასტურებს, რომ არ გსურდათ, რომ გომელაურისთვის დაგვესვა კრიტიკული შეკითხვები", — განაცხადა ხათუნა სამნიძემ.

დღეს, პარლამენტის პლენარული სხდომის დარბაზში ჟურნალისტებმა ისევ გადმოფინეს საპროტესტო ბანერი გარდაცვლილი კოლეგის, ლექსო ლაშქარავაზე მოძალადეების დასჯის მოთხოვნით.

18 ივლისს, პარლამენტში ვახტანგ გომელაურს ოპოზიციონერმა დეპუტატებმა სიტყვა შეაწყვეტინეს და 5-6 ივლისის ძალადობრივ მოვლენებში მონაწილეების დასჯა მოითხოვეს. პარალელურად, ჟურნალისტებმა გარდაცვლილი კოლეგის, ლექსო ლაშქარავას საქმის ეფექტიანად და გამჭვირვალედ გამოძიებისა და დამნაშავეების დასჯის მოთხოვნით პლენარული სხდომის დარბაზში საპროტესტო ბანერი გადმოფინეს.

სიტყვიერი დაპირისპირების შემდეგ ოპოზიციონერი დეპუტატების ნაწილმა სხდომა დატოვა. ქართულმა ოცნებამ ჟურნალისტების ბანერის ჩამოხსნა სთხოვა, წინააღმდეგ შემთხვევაში კი შს მინისტრის მოსმენის გადადება დააანონსა. ეს ინიციატივა ჯერ თავად პარლამენტის თავმჯდომარემ, კახა კუჭავამ გამოთქვა, შემდეგ ამაზე სასაუბროდ ჟურნალისტებთან მანდატურის სამსახურის წარმომადგენელი მივიდა, ბოლოს კი დეპუტატი ირაკლი ზარქუა. ჟურნალისტების პოზიცია იყო, რომ ბანერი პროტესტის მშვიდობიანი ფორმაა და ის არ უშლის ხელს სხდომის გაგრძელებას. საბოლოოდ, კახა კუჭავამ, თანაპარტიელებთან შეთანხმებით, გომელაურის მოსმენის გადადება გადაწყვიტა.

გაიგე მეტი: