საქართველოს პრეზიდენტი, სალომე ზურაბიშვილი აცხადებს, რომ მედიას უნდა ჰქონდეს შესაძლებლობა, შეზღუდვების გარეშე იმუშაოს. ასე ეხმაურება იგი ქართული ოცნების დეპუტატების ბოიკოტს კრიტიკული მედიის მიმართ.

"ნებისმიერი კრიტიკული პოზიციის მიუხედავად, ყველა ვთანხმდებით, რომ ქვეყანაში სიტყვისა და გამოხატვის თავისუფლება დაცული უნდა იყოს და მედიას უნდა მიეცეს შეზღუდვების გარეშე მუშაობის შესაძლებლობა!" — აცხადებს ზურაბიშვილი.

ქართული ოცნების წარმომადგენლებმა კრიტიკულ მედიასთან კომუნიკაცია მას შემდეგ გაწყვიტეს, რაც ჟურნალისტებმა კოლეგის, ლექსო ლაშქარავას გარდაცვალებაზე პასუხისმგებლობა მთავრობას დააკისრეს და პრემიერმინისტრის, ირაკლი ღარიბაშილის გადადგომა მოითხოვეს.

17 ივლისს, პრემიერმინისტრის, ირაკლი ღარიბაშილის ღონისძიებაზე არ მიიწვიეს სამი ტელეკომპანია — მთავარი არხი, TV პირველი და ფორმულა. ღონისძიებაზე მიწვეული არ იყო არც ონლაინმედია. On.ge-მ მიზეზი მთავრობის ადმინისტრაციის პრესსამსახურს ჰკითხა, რომელმაც ეს ინფორმაცია დაადასტურა და მიზეზად დაასახელა ის, რომ ამ სამ არხს "კითხვებზე პასუხები არ აინტერესებს" და ისინი მუდმივად "დესტრუქციულად" იქცევიან.

მედიის პროტესტი დღეს პარლამენტის შენობაშიც გაგრძელდა: ჟურნალისტებმა ჯერ პარლამენტის დერეფანში გარდაცვლილი კოლეგის, ლექსო ლაშქარავას ფოტოები გაშალეს, შინაგან საქმეთა მინისტრის, ვახტანგ გომელაურის სიტყვით გამოსვლისას კი პლენარულ დარბაზში გადმოფინეს ბანერი წარწერით "დასაჯეთ დამნაშავეები". მედიის და ოპოზიციონერი დეპუტატების პროტესტის გამო პლენარული სხდომა შეწყდა.

პარლამენტის თავმჯდომარემ, კახა კუჭავამ ჟურნალისტებს მოუწოდა ბანერი ჩამოეხსნათ, წინააღმდეგ შემთხვევაში გომელაურის მოსმენა გადაიდებოდა. ამ საკითხზე სასაუბროდ მედიის წარმომადგენლებთან პარლამენტის მანდატურის სამსახურის წარმომადგენლებიც მივიდნენ. იგივე პოზიციები დააფიქსირეს ქართული ოცნების სხვა დეპუტატებმაც. ჟურნალისტებმა ბანერის ჩამოხსნაზე უარი თქვეს იმ არგუმენტით, რომ ეს იყო პროტესტის მშვიდობიანი ფორმა და გომელაურს სიტყვის გაგრძელება და კითხვებზე პასუხების გაცემა ბანერის ფონზეც შეეძლო. საბოლოოდ, მმართველი გუნდის გადაწყვეტილებით, შინაგან საქმეთა მინისტრის მოსმენა გადაიდო.

გაიგე მეტი: