ოზი ოსბორნი 76 წლის ასაკში გარდაიცვალა "სიყვარულის გარემოცვაში", — ნათქვამია მისი ოჯახის მიერ გავრცელებულ განცხადებაში.

Black Sabbath-ის დამფუძნებელმა მუსიკოსმა უკანასკნელი კონცერტი სამი კვირის წინ, ბირმინგემის "ვილა პარკზე" დადგა.

ოჯახის განცხადებაში ნათქვამია: "ეს უფრო დიდი სევდაა, ვიდრე სიტყვებით შეიძლება გადმოცემა. ჩვენ იძულებულნი ვართ გამოვაცხადოთ, რომ ჩვენი საყვარელი ოზი ოსბორნი დღეს დილით გარდაიცვალა. ის ოჯახთან ერთად იყო და სიყვარულის გარემოცვაში დაიძინა".

როკერმა შეძლო ემოციური გამოსამშვიდობებელი კონცერტი ეჩუქებინა გულშემატკივრებისთვის ამ თვეში, როცა 2005 წლის შემდეგ პირველად გაერთიანდა Black Sabbath-ის თავდაპირველ წევრებთან — ტონი აიომისთან, გიზერ ბატლერთან და ბილ უორდთან.

"წარმოდგენაც არ გაქვთ, რას ვგრძნობ — გმადლობთ მთელი გულით," — უთხრა ოსბორნმა აუდიტორიას ბოლო გამოსვლაში.

ვარსკვლავი მუსიკის ტიტანად ითვლებოდა — გადაურჩა სკანდალებს, რომლებიც სხვების კარიერას დაამთავრებდა, და გადაიტანა ისეთი ჯანმრთელობის პრობლემები, რომლებიც უმეტესობას საწოლს მიაჯაჭვავდა.

იქნება ეს ცოცხალი ღამურასა თუ მტრედის თავების მოკბეჩა, ჭიანჭველების ხაზის შეყნოსვა, ან აშშ-ის სამხედრო მემორიალზე მოშარდვა — ოსბორნი სცენაზეც და სცენის მიღმაც თავისი ექსცენტრული ქცევებით იყო გამორჩეული.

ჰიტებით, როგორებიცაა Iron Man, War Pigs და Paranoid, Black Sabbath-ის ოკულტური თემების პროპაგანდამ ერთდროულად დიდი პოპულარობა და სკანდალი გამოიწვია, ხოლო რომის პაპმა ოსბორნი "სუბლიმინალური სატანური გავლენისთვის" გააკრიტიკა.

ოსბორნის ყველაზე სკანდალური მომენტი იყო, როცა მან სცენაზე ნასროლ ღამურას თავი მოაჭამა. მოგვიანებით თქვა, რომ ღამურა რეზინის ეგონა.

ფოტო: Getty Images

1979 წელს ჯგუფიდან ნარკოტიკებით გამოწვეული ქცევის გამო გაძევების შემდეგ, ოსბორნმა წარმატებული სოლო კარიერა შექმნა, ჰიტებით, როგორებიცაა Crazy Train და Hellraiser.

2003 წელს ის კვადროციკლის ტარებისას ავარიაში დაშავდა, რამაც სერიოზული გავლენა მოახდინა მის ჯანმრთელობაზე.

მიუხედავად ამისა, მომღერალმა შეძლო გადარჩენა და 2000-იანების დასაწყისში რიალითი შოუში The Osbournes ახალი იმიჯით დაბრუნდა, მას შემდეგ, რაც ცოლის, შერონის დახმარებით ალკოჰოლსა და ნარკოტიკებს შეეშვა.

1997 წელს Black Sabbath-ის ორიგინალური შემადგენლობა კვლავ გაერთიანდა. ხუთი წლის შემდეგ ოსბორნი და აიომი მოულოდნელად გამოჩნდნენ ბუკინგემის სასახლეში, დედოფლის ოქროს იუბილეს კონცერტზე, სადაც სიმღერა Paranoid შეასრულეს.

ოზი ოსბორნის სიკვდილამდე ხუთი წლით ადრე დაუდასტურდა პარკინსონის დაავადება.

ოსბორნი, რომლის ნამდვილი სახელი ჯონ მაიკლ ოსბორნი იყო, დაიბადა 1948 წლის 3 დეკემბერს. ის მშობლებმა, ლილიანმა და ჯონმა, სამ უფროს და ორ უმცროს ძმასთან ერთად ბირმინგემში, პატარა ოროთახიან სახლში გაზარდეს.

იხილეთ ასევე: