გიორგი დუნდუა ახალგაზრდა ქართველი ფოტოგრაფია. შავ-თეთრი სამყარო, რომელსაც გიორგი ფირზე აღბეჭდავს, წარსულის გამოძახილია - წარსულის, რომელიც თითოეული ჩვენგანისთვის არც თუ ისე შორეულია, თუმცა მის კვალს ნაკლებად ვამჩნევთ. ჩვენ ვფიქრობთ, რომ უშუქობა, სიღატაკე, გაჭირვება და ყველაფერი, რაც 90-იან წლებთან გვაკავშირებდა, უკან დარჩა და აღარ არსებობს, მაგრამ გიორგის ნამუშევრები გვახსენებს, რომ ჩვენგან არც ისე შორს - მთებსა და სოფლებში - ის ისევ ცოცხალია.

"ეს ისტორიები თანამედროვე სამყაროსთვისაც არ არის უცხო, რაც უფრო მაღლა ავდივართ მთებში, რურალურ გარემოში, მით უფრო ხშირად გვხვდება უკვე დავიწყებული სურათები. ამიტომ მიყვარს მსგავსი სცენების ნახვა და კადრირება", - ამბობს გიორგი დუნდუა.

გიორგიმ ფოტოების გადაღება 2007 წელს დაიწყო და მას შემდეგ აქტიურად არის დაკავებული ამ საქმიანობით. როგორც თვითონ ამბობს, ფოტოხელოვნების სიყვარული ოჯახმა განაპირობა. მისი მამა და ბაბუა ასევე ფოტოგრაფიით იყვნენ გატაცებულნი. შავ-თეთრი სტილიც სწორედ წარსულში მიღებული შთაბეჭდილებების გამოხატვაა.

"შავ-თეთრი რატომღაც ასოცირდება წარსულთან, სიძველესთან. დღეს გაცილებით მეტი მიზეზის გამო მომწონს. ერთი, რომ შეუძლია ღიად და დეტალებში გადმოსცეს ემოცია, თითოეულ ნაოჭში ჩადის და მეორეც - აღმქმელზე განსაკუთრებულ შთაბეჭდილებას ახდენს", - ამბობს ფოტოგრაფი.

ახალგაზრდა ფოტოგრაფის ინტერესს ეთნიკური, რელიგიური თუ სხვა უმცირესობებიც იპყრობენ. მისი ერთ-ერთი ფოტოსერია სწორედ მრავალეთნიკურ სოფლებში ახალგაზრდების ცხოვრებას ეძღვნებოდა. ფოტოგრაფმა აღბეჭდა, თუ როგორ არსებობენ ერთ სივრცეში ქართველი, აზერბაიჯანელი და სომეხი თანატოლები.

"ფოტოსერია გადავიღე მარნეულში, აღვწერე, როგორ ცხოვრობს პოლიეთნიკური სოფელი".

გიორგი დუნდუას ფოკუსში სოციალური პრობლემები ხშირად ხვდება. მისი ერთ-ერთი შთაგონების წყარო საკუთარ სახლს მოწყვეტილი ადამიანები არიან, იგულისხმება როგორც შიდა, ასევე გარე მიგრაცია.

"ფოტოსერია მოგვითხრობს აჭარიდან მიგრირებული რელიგიური უმცირესობების ცხოვრებას ქვემო ქართლის მარნეულის მუნიციპალიტეტში. მიგრაციის ძირითადი მიზეზი იყო ეკოლოგიური მდგომარეობა, მეწყერული და ზვავური პროცესები. სოფლები მარადისი, ახალი დიოკნისი და თამარისი ხულოდან ემიგრირებულმა მოსახლეობამ შექმნა 20 წლის წინ. პროექტი მოგვითხრობს, როგორ შეინარჩუნეს მაღალმთიანი რეგიონის ტრადიციები, კულტურული და რელიგიური თავისებურებები ადამიანებმა ახალ სივრცეში".

გიორგი დუნდუამ 2013-2016 წლებში არაერთხელ იმოგზაურა მეზობელ თურქეთში, სადაც ხშირად ხვდებოდა არალეგალურად დასაქმებულ ქართველებს. როგორც ჩანს, ამ შეხვედრებმა მასზე წარუშლელი კვალი დატოვა.

"ვნახე, როგორ მუშაობენ 20-25 წლის ახალგაზრდები მიწის ქვეშ, მტვერსა და ბუღში, იმხელა მანქანებზე, რომლებიც მათთვის დაშვებულ წონასა და ზომას ათასჯერ აღემატება. ეს ყველაფერი კი ხდება არალეგალურად", - ამბობს გიორგი.

ფოტოგრაფიას შეუძლია მნიშვნელოვანი როლი ითამაშოს საზოგადოებრივი ცნობიერებისა და მგრძნობელობის გაზრდაში - გიორგი დუნდუა

მისი აზრით, ეს თემა ტაბუირებულია და მასზე მეტი უნდა ვისაუბროთ. მნიშვნელოვანია, რომ ხელოვნების გზით, რბილად ვამხილოთ ემიგრაციის ტვირთი, რომელიც ახალგაზრდებს ახალგაზრდობას ართმევს.

ამ ფოტოების სერია ასახავს თიანეთში მცხოვრები გლეხების გაჭირვებას. თიანეთში სიღარიბე განსაკუთრებით იგრძნობა.

გიორგი დუნდუას ფოტოები არაერთ გამოცემაში დაბეჭდილა. მისი გამოფენებიც საკმაოდ ხშირად ტარდება და ძირითადად, დიდ მოწონებას იმსახურებს. ახალგაზრდა ქართველი ფოტოგრაფის შემოქმედებით არა მხოლოდ საქართველოში, არამედ საზღვარგარეთაც ინტერესდებიან და სულ მალე მისი გამოფენა ჰონგ-კონგშიც მოეწყობა. გამოფენაზე წარმოდგენილი იქნება ფოტოები გოგონების მიმართ არსებული სტერეოტიპების თემაზე.

გიორგი დუნდუას სხვა ფოტოების ნახვა შეგიძლიათ Facebook გვერდზე.