ოსკარის მფლობელი ასგარ ფარადი, 2018 წელს კანში წარმოდგენილი ესპანეთში გათამაშებული ისტორიის (ყველამ იცის) შემდეგ ისევ ირანს უბრუნდება და ვალის გადაუხდელობის გამო პატიმრობაში მყოფი რაჰიმის (ამირ ჯადიდი) ამბავს ჰყვება.

მომხიბვლელი გარეგნობის, ცოლს გაშორებული ახალგაზრდა კაცი, რომელიც უცნაურად იღიმის, საპატიმროდან ორი დღით გამოდის. რაჰიმი ვალისაგან თავის დასაღწევად ოჯახისაგან გასაიდუმლოებულ შეყვარებულთან, ფარხონდესთან (სარა გოლდასთი) ერთად წინასწარ შედგენილი გეგმის შესრულებას იწყებს.

ფარხონდე რაჰიმს ავტობუსის გაჩერებაზე შემთხვევით ნაპოვნი ოქროს მონეტებით ელოდება. წყვილი სწორედ ამ 17 მონეტის გაყიდვას დაისახავს მიზნად. ეს საქმე მარტივი არ აღმოჩნდება.

რაჰიმის შეყვარებული, და და შვილი მას წინააღმდეგობებით სავსე გზაზე მიზნის მიღწევაში ეხმარებიან.

ასგარ ფარადი, შესანიშნავ ოპერატორთან (ალი ღაზი Ali Ghazi) ერთად, ბრწყინვალედ იხელთებს ადგილს და დროს. მანძილები და დინამიკა ყოველთვის მთლიანობის ნაწილია და რაღაც აუცილებელს ერთვის. ფარადის მრავალშრიანი და სამყაროსთან შერწყმული ატმოსფერო არც მხოლოდ პოეზიაა ხოლმე და მით უფრო, არც ეგზოტიკა.

რეჟისორი გამორჩეულ მთავარ გმირს ნაცნობ მოცემულობაში გამოამწყვდეს და ისტორიაც მოულოდნელი გზით ვითარდება.

შირაზის ლურჯი ცის ქვეშ პატიოსნებაზე, მორალზე და თავისუფლების ფასზე, მოთხრობულ ამბავში მანიპულაციის და კონფრონტაციის ინსტრუმენტი სოციალური მედია აღმოჩნდება.

ფოტო: AmirhosseinShojaei

ფარადი მიიჩნევს, რომ სოციალურ მედიას ადამიანების მანიპულირებისთვის არაერთი ინსტიტუცია იყენებს. ციხეში შესაძლოა სწორედ შანტაჟის ან მოგონილი მტკიცებულების საფუძველზე აღმოჩნდე.

რეჟისორი ამ ისტორიაში პარადოქსად იმას მიიჩნევს, რომ სოციალური სივრცე კომუნიკაციის და გახსნის ნაცვლად, მალვად და სიმულაციად იქცევა.

ლუმიერების დარბაზში, რამდენიმე წუთის განმავლობაში აპლოდისმენტებით ესალმებოდნენ ირანელ რეჟისორს, რომელმაც 2016 წელს კანში წარმოდგენილ ფილმზე დასწრება მისთვის მისჯილი შინაპატიმრობის გამო ვერ შეძლო.

"ერთი წლის წინ, ამას ვერ წარმოვიდგენდი. ეს, დიდ დარბაზში ჩემი პირველი კინოსეანსია", — თქვა სამადლობელ სიტყვაში შინაპატიმრობას და ქვეყანაში მძიმე კოვიდ-პანდემიას დახსნილმა ასგარ ფარადიმ, რომლის გმირიც, წამყვანმა გამოცემებმა გაყრის შემდეგ მის საუკეთესო სურათად აღიარეს.