ცენტრალურ ტეხასში ასობით მაშველი აქტიურად ეძებს დაკარგულებს მას შემდეგ, რაც ძლიერმა წვიმებმა დამანგრეველი წყალდიდობა გამოიწვია. დაღუპულია მინიმუმ 51 ადამიანი, მათ შორის 15 ბავშვი.

დაკარგულთა ზუსტი რაოდენობა უცნობია, თუმცა 27 მათგანი გოგონაა, რომლებიც ქრისტიანულ ბანაკში, სახელად Camp Mystic, მდინარე გვადალუპეს პირას, სტიქიის ეპიცენტრში იმყოფებოდნენ.

მაშველებმა სულ დაახლოებით 850 ადამიანი გადაარჩინეს. სამაშველო ოპერაციაში 1700-ზე მეტი პირი მონაწილეობს.

ტეხასის გუბერნატორმა გრეგ ებოტმა განაცხადა, რომ სამძებრო სამუშაოები გაგრძელდება 24 საათიან რეჟიმში. მან სოციალურ ქსელში დაწერა, რომ სამძებრო სამუშაოები იქამდე არ გაჩერდება, სანამ ქრისტიანული ბანაკიდან დაკარგულ ყველა გოგონას არ იპოვიან.

"დღეს ვეწვიე Camp Mystic-ს.

ბანაკი და მის გვერდით გამავალი მდინარე საშინლად იყო განადგურებული — ისეთი მასშტაბით, როგორიც არც ერთ ბუნებრივი კატასტროფის დროს მინახავს.

წყლის დონემ კაბინების სახურავამდე მიაღწია — ეს მართლაც შემზარავი იყო.

ჩვენ არ გავჩერდებით, სანამ არ ვიპოვით ყველა გოგონას, ვინც იმ კაბინებში იმყოფებოდა," — დაწერა მან.

ცნობისთვის, ტეხასში წყალდიდობა 4 ივლისს დაიწყო, როდესაც მდინარე გვადალუპე, კალაპოტიდან გადმოვიდა.