ილიაუნის, ჯიპას, აგრუნის და ფრიუნის სტუდენტური მოძრაობები თვითმმართველობის არჩევნებს ბოიკოტს უცხადებენ. მათ მიერ გავრცელებულ განცხადებებში ნათქვამია, რომ არჩევნების გაყალბების, ევროკავშირში გაწევრიანების მოლაპარაკებების შეჩერებისა და უკანონო დაკავებებისა ფონზე, თვითმმართველობის არჩევნებში მონაწილეობა "უპატივცემულობა, დაცინვა" და "ღალატია".

ჯიპას სტუდენტური ერთობა სოციალურ ქსელში წერს, რომ "ყველა პოლიტიკურმა ძალამ, რომელიც უგულებელყოფს ხალხის ნებას და სინდისის პატიმრების ბრძოლას, საბოლოოდ უნდა დატოვოს პოლიტიკური ასპარეზი".

"ჯიპას სტუდენტური ერთობის წევრები თვეების განმავლობაში აქტიურად ვართ ჩართული პროტესტში. ამ ბრძოლის მანძილზე არაერთ მოძალადე, სამშობლოს მოღალატე და ცრუ მოწმე პოლიციელს შევხვდით. სწორედ ამ პოლიციელების საშუალებით ატარებს რეჟიმი კერძო ინტერესებს და აკავებს იმ ადამიანებს, ვინც სამშობლოს დამოუკიდებლობისთვის იბრძვის.

ბრძოლის სხვადასხვა ეტაპზე ჩვენ განვიცადეთ სხვადასხვანაირი ღალატი რეჟიმისგან; მაგალითად: გაყალბებული არჩევნები, ევროკავშირთან მოლაპარაკებების შეწყვეტა, თანამოქალაქეების უკანონო დაკავებები და მათთვის მრავალი წლით თავისუფლების აღკვეთა…

ამ ყველაფრის შემდეგ "ოპოზიციური" პარტიებისა და კოალიციების ნაწილი, მათ შორის "ძლიერი საქართველო" და "საქართველოსთვის", გეგმავს მონაწილეობას იმ ადგილობრივი თვითმმართველობის არჩევნებში, რომელსაც კვლავ ბიძინა ივანიშვილის კონტროლს დაქვემდებარებული ცესკო ჩაატარებს. მათი ეს გადაწყვეტილება უპატივცემულობა და დაცინვაა.

თუ ეს გადაწყვეტილება ძალაში დარჩება, ჩვენ, სტუდენტები, დავიწყებთ აქტიურად ამ პოლიტიკური პარტიების მხილებას, რათა საზოგადოებამ გაიცნოს მათი მოღალატეობრივი სახე.

ყველა პოლიტიკურმა ძალამ, რომელიც უგულებელყოფს ხალხის ნებას და სინდისის პატიმრების ბრძოლას, საბოლოოდ უნდა დატოვოს პოლიტიკური ასპარეზი.

ბოიკოტი ბიძინას ცესკოს მიერ ჩატარებულ არჩევნებს!

დიდება დამოუკიდებელ საქართველოს!", — წერს ჯიპას სტუდენტური ერთობა სოციალურ ქსელში.

ილიაუნის სტუდენტური მოძრაობის თქმით, თვითმმართველობის არჩევნებში მონაწილეობა "არის ღალატი 218-დღიანი უწყვეტი პროტესტის, ღალატი პოლიტპატიმრების და ღალატი ამ ქვეყნის 70%-ის, რომელიც მომავალი ე.წ. არჩევნების ბოიკოტის მომხრეა".

"ჩვენ, ილიაუნის სტუდენტური მოძრაობას, აქამდეც არაერთხელ დაგვიფიქსირებია პოზიცია ე.წ. თვითმმართველობის არჩევნებთან დაკავშირებით და დღეს, პარტია ლელოს გადაწყვეტილების ფონზე, კიდევ ერთხელ, აუცილებლად, მიგვაჩნია, ჩვენი პოზიციის მკაფიოდ გამოხატვა.

დღიანი უწყვეტი პროტესტისა, ღალატი პოლიტპატიმრების და ღალატი ამ ქვეყნის 70%-ის, რომელიც მომავალი ე.წ. არჩევნების ბოიკოტის მომხრეა.

არ ვაპირებთ მონაწილეობა მივიღოთ რუსული რეჟიმის მიერ მოწყობილი არჩევნებად წოდებულ ფარსში და ვემიჯნებით ყველა იმ პოლიტიკურ ჯგუფს, რომელიც „სისტემურ ოპოზიციად“ და რეჟიმის სასურველ დეკორაციად იქცა.

გვჯერა, რომ გამარჯვება არა თანამშრომლობაში, არამედ ჩვენს პრინციპულობაშია.

ძალა ერთობაშია!

ძალა სტუდენტების ერთობაშია!", — ნათქვამია განცხადებაში.

აგრუნისა და ფრიუნის სტუდენტური მოძრაობის მიერ გავრცელებულ წერილში ნათქვამია, რომ "არსებული რეჟიმის იზოლაცია კრიტიკული მნიშვნელობისაა. ნებისმიერი ქმედება, რომელიც ამ იზოლაციის დარღვევისკენაა მიმართული, ჩვენს თვალში განიხილება როგორც არა პოლიტიკური შეცდომა, არამედ ღალატი. ღალატი იმ ადამიანების, ვინც თავისუფლებისთვის თავიანთი სიცოცხლის ყველაზე ძვირფას წლებს თმობენ".

"პროტესტში მყოფ სტუდენტურ მოძრაობებს, სტუდენტებს აქამდეც არაერთხელ დაგვიფიქსირებია პოზიცია ე.წ. თვითმმართველობის არჩევნებთან დაკავშირებით.

ვინაიდან, ბიზნესმენ მამუკა ხაზარაძისა და 20 ივნისის შემქმნელ გიორგი გახარიას მიერ ჩამოყალიბებულმა პარტიებმა გადაწყვიტეს არჩევნებში მონაწილეობა, საჭიროდ მიგვაჩნია, კიდევ ერთხელ, მკაფიოდ დავაფიქსიროთ ჩვენი პოზიცია.

არსებული რეჟიმის იზოლაცია კრიტიკული მნიშვნელობისაა. ნებისმიერი ქმედება, რომელიც ამ იზოლაციის დარღვევისკენაა მიმართული, ჩვენს თვალში განიხილება როგორც არა პოლიტიკური შეცდომა, არამედ ღალატი. ღალატი იმ ადამიანების, ვინც თავისუფლებისთვის თავიანთი სიცოცხლის ყველაზე ძვირფას წლებს თმობენ.

ჩვენ არ ვაპირებთ შევეგუოთ იმ მდგომარეობას, რომელშიც ჩვენი თანატოლების, რეჟიმის წინააღმდეგ მებრძოლი ადამიანების, სინდისის პატიმრების ოჯახებს ზურგს აქცევენ.

ნუ გეგონებათ, რომ საზოგადოება ვერ ხედავს, ვინ იბრძვის თავისუფლებისთვის და ვინ თამაშობს დადგმულ სპექტაკლში. არ ვაპირებთ მონაწილეობა მივიღოთ იმ "არჩევნებში", რომელშიც გამარჯვება არა ხალხის მიერ მიღებულ გადაწყვეტილებაზე, არამედ კულისებს მიღმა გარიგებებზეა დაფუძნებული", — ნათქვამია ფრიუნისა და აგრუნის სტუდენტური მოძრაობის მიერ გავრცელებულ განცხადებაში.

შეგახსენებთ, რომ ოქტომბერში დანიშნულ თვითმმართველობის არჩევნებს 8 ოპოზიციურმა პარტიამ ბოიკოტი გამოუცხადა. არჩევნებში მონაწილეობის შესახებ განაცხადეს ლელო — ძლიერმა საქართველომ და პარტიამ გახარია საქართველოსთვის.

5 ივლისს, ლელო — ძლიერი საქართველოს სახელით, პარტიის წევრმა ალეკო ელისაშვილმა ბრიფინგზე განაცხადა, რომ 5 ივლისიდან უკვე დეკლარირებულად და ოფიციალურად კოალიცია ლელო — ძლიერი საქართველო სარჩევნო ბრძოლაში შედის.

ლელო — ძლიერი საქართველოს გადაწყვეტილებას თვითმმართველობის არჩევნებში მონაწილეობის შესახებ უარყოფითი და არაერთგვაროვანი რეაქცია არა მხოლოდ ოპოზიციურად განწყობილ საზოგადოებაში მოჰყვა, არამედ თავად პარტიაში.

5 ივლისს პარტიის პოლიტსაბჭო ჯერ საბა ბუაძემ დატოვა, შემდეგ — დეა მეტრეველმა და ანა ნაცვლიშვილმა.