უკრაინის პრეზიდენტმა ვოლოდიმირ ზელენსკიმ და აშშ-ის პრეზიდენტმა დონალდ ტრამპმა 4 ივლისს სატელეფონო საუბარი გამართეს, რომელსაც ზელენსკიმ "ყველაზე პროდუქტიული" უწოდა. საუბარი რუსული თავდასხმების ფონზე უკრაინის თავდაცვის გაძლიერების საჭიროებას ეხებოდა. ამის შესახებ ინფორმაციას Axios ავრცელებს.

სატელეფონო საუბრისას, პრეზიდენტმა ტრამპმა უკრაინის პრეზიდენტ ზელენსკის განუცხადა, რომ რუსეთის თავდასხმების ესკალაციის გამო, აშშ-ს სურს უკრაინისთვის საჰაერო თავდაცვის საკითხებში დახმარება, — ამის შესახებ უკრაინელმა ოფიციალურმა პირმა Axios-ს განაცხადა.

მათვე ცნობით, ტრამპი და ზელენსკი შეთანხმდნენ, რომ აშშ-სა და უკრაინის გუნდები მალე შეხვდებიან საჰაერო თავდაცვისა და სხვა შეიარაღების მიწოდების საკითხებთან დაკავშირებით.

ამის შემდეგ, ზელენსკიმ X-ში დაწერა, რომ მან ტრამპს ესაუბრა „საჰაერო თავდაცვის შესაძლებლობებზე“ და რომ ისინი შეთანხმდნენ, რომ ერთად იმუშავებენ თავიანთი ცის დაცვის გასაძლიერებლად.

"ჩვენ — უკრაინაში მადლიერები ვართ გაწეული მხარდაჭერისთვის. ეს გვეხმარება დავიცვათ სიცოცხლე, დავიცვათ ჩვენი თავისუფლება და დამოუკიდებლობა. ჩვენ ბევრს მივაღწიეთ ამერიკასთან ერთად და მხარს ვუჭერთ ყველა ძალისხმევას, რომელიც მიმართულია მკვლელობების შესაჩერებლად და სამართლიანი, მდგრადი და ღირსეული მშვიდობის აღსადგენად. საჭიროა კეთილშობილური შეთანხმება მშვიდობისთვის", — წერს ზელენსკი.

ტრამპმა კვლავ დაადასტურა მხარდაჭერა პატრიოტის ტიპის ჰაერსაწინააღმდეგო სარაკეტო სისტემების მიწოდებისადმი და პირობა დადო, რომ გადაამოწმებს შეჩერებული შეიარაღების გადაცემის საკითხს. ასევე მათ განიხილეს გერმანიასთან თანამშრომლობა თავდაცვის შესაძლებლობების გაძლიერების მიზნით.

საუბრის კიდევ ერთი მთავარი თემა ერთობლივი დრონებისა და თავდაცვის ტექნოლოგიების წარმოება იყო. ზელენსკიმ თქვა, რომ აშშ-ის ტექნოლოგიურ კომპანიასთან ერთად Swift Beat, რომლის თანადამფუძნებელი ერიკ შმიდტია (ყოფილი Google-ის CEO), უკრაინაში ასობით ათასი დრონის გამოშვება იგეგმება.

საუბარი მას შემდეგ გაიმართა, რაც რუსეთმა კიევზე ყველაზე მასშტაბური საჰაერო იერიში მიიტანა. მხარეებმა ასევე შეთანხმდნენ, რომ ტექნიკური ჯგუფები შეიმუშავებენ თანამშრომლობის შემდეგ ეტაპებს, რაც თავდაცვითი წარმოების განვითარებასა და სტრატეგიულ ინვესტიციებს მოიცავს.