ოცნების ხელისუფლების შინაგან საქმეთა მინისტრის სანქცირებული მოადგილის, ალექსანდრე დარახველიძის ცნობით, სპეციალურ დავალებათა დეპარტამენტის ყოფილი ხელმძღვანელის, სანქცირებული ზვიად ხარაზიშვილის მოადგილემ, ასევე სანქცირებულმა მირზა კეზევაძემ თანამდებობა საკუთარი სურვილით დატოვა.

მისივე თქმით, მირზა კეზევაძე "არავის გაუშვია სამსახურიდან".

"ბატონი მირზა კეზევაძე არავის გაუშვია სამსახურიდან. მან საკუთარი სურვილით მიმართა მინისტრს და ის წავიდა სამსახურიდან. არანაირ გაშვებას არ ჰქონია ადგილი, საკუთარი სურვილით დატოვა შინაგან საქმეთა სამინისტროს რიგები", — აღნიშნა დარახველიძემ.

ცნობისათვის, მირზა კეზევაძე აშშ-ის, დიდი ბრიტანეთის, გერმანიის, ჩეხეთისა და ბალტიისპირეთის ქვეყნების მიერაა სანქცირებული. ის შეერთებულმა შტატებმა მაგნიტსკის სიაშიც შეიყვანა.

ბრიტანეთის მთავრობა მიუთითებდა, რომ კეზევაძე "არის ან/და პასუხისმგებელი იყო ისეთ საქმიანობაზე, რომელიც წარმოადგენს სერიოზულ დარღვევას ადამიანის უფლებისა, არ დაექვემდებაროს სასტიკ, არაადამიანურ ან ღირსების შემლახველ მოპყრობას ან დასჯას".

რაც შეეხება განსაკუთრებულ დავალებათა დეპარტამენტის დირექტორს, სანქცირებულ ზვიად ხარაზიშვილს, მან თანამდებობა 10 ივნისს დატოვა. ოცნების ხელისუფლების შსს-ს ცნობით, მის ადგილს უწყებაში რომან ქარცივაძე დაიკავებს.

"შინაგან საქმეთა სამინისტროში კიდევ ერთი ცვლილება განსაკუთრებულ დავალებათა დეპარტამენტს შეეხო — აღნიშნული დეპარტამენტის დირექტორის თანამდებობაზე რომან ქარცივაძე დაინიშნა," — ვკითხულობთ უწყების განცხადებაში.