ორგანიზაცია "დაფიონი" ლელო — ძლიერი საქართველოს თვითმმართველობის არჩევნებში მონაწილეობის მიღების გადაწყვეტილებას სოციალურ ქსელში გამოქვეყნებული განცხადებით ეხმაურება. ორგანიზაციის თქმით, ლელო — ძლიერი საქართველოს ეს გადაწყვეტილება ღალატია და არა ბრძოლა და მხარს მხოლოდ იმათ უჭერენ, ვინც რეალურად იბრძვის.

"ვუერთდებით!

ბრძოლა არ არის ის, რაც "ლელომ" გააკეთა. ეს ღალატია, პირდაპირი მნიშვნელობით.

ბრძოლა იმართება ციხის კედლებს მიღმა, ქუჩებში, სასამართლოებზე და ხმაში, რომელიც არ გაჩუმებულა და არც გაჩუმდება!

ჩვენი მხარდაჭერა მხოლოდ მათ, ვინც მართლა იბრძვის!

ბოიკოტი თვითმმართველობის არჩევნებს!
არ წახვიდე არჩევნებზე, რომელსაც არანაირი შანსი არ აქვს სამართლიანობის.

როცა ბრძოლის დროს ხალხს ღალატობ, შენ უკვე აღარ ხარ ოპოზიცია, შენ ხარ პოზიცია, თან სამარცხვინო პოზიცია.

თავისუფლება რეჟიმის ტყვეებს!" — წერია განცხადებაში.

შეგახსენებთ, რომ ოქტომბერში დანიშნულ თვითმმართველობის არჩევნებს 8 ოპოზიციურმა პარტიამ ბოიკოტი გამოუცხადა. არჩევნებში მონაწილეობის შესახებ განაცხადეს ლელო — ძლიერმა საქართველომ და პარტიამ გახარია საქართველოსთვის.

5 ივლისს, ლელო — ძლიერი საქართველოს სახელით, პარტიის წევრმა ალეკო ელისაშვილმა ბრიფინგზე განაცხადა, რომ 5 ივლისიდან უკვე დეკლარირებულად და ოფიციალურად კოალიცია ლელო — ძლიერი საქართველო სარჩევნო ბრძოლაში შედის.

"ლელო — ძლიერი საქართველო" თვითმმართველობის არჩევნებში მონაწილეობას მიიღებს

ლელო — ძლიერი საქართველოს გადაწყვეტილებას თვითმმართველობის არჩევნებში მონაწილეობის შესახებ უარყოფითი და არაერთგვაროვანი რეაქცია არა მხოლოდ ოპოზიციურად განწყობილ საზოგადოებაში მოჰყვა, არამედ თავად პარტიაში.

5 ივლისს პარტიის პოლიტსაბჭო ჯერ საბა ბუაძემ დატოვა, შემდეგ — დეა მეტრეველმა და ანა ნაცვლიშვილმა.

თვითმმართველობის არჩევნებში მონაწილეობის გამო, "ლელო — ძლიერ საქართველო" პოლიტსაბჭოს წევრებმა დატოვეს