დიდმა ბრიტანეთმა სირიასთან დიპლომატიური ურთიერთობები აღადგინა. ამის შესახებ ინფორმაციას Sky News ავრცელებს.

ბრიტანეთის საგარეო საქმეთა მინისტრი დევიდ ლამი ბოლო 14 წლის განმავლობაში პირველი ბრიტანელი მინისტრი გახდა, ვინც სირიას ეწვია.

ლამი დამასკოში დროებითი პრეზიდენტის, აჰმედ ალ შარასა (რომელიც ასევე აჯანყებულთა ჯგუფ ჰაიათ თაჰრირ ალ-შამის (HTS) ლიდერია) და საგარეო საქმეთა მინისტრ ასად ალ შაიბანის შეხვდა.

HTS-ის მიერ ბაშარ ალ ასადის რეჟიმის დამხობის შემდეგ, ეს სირიასთან მიმართებით ბრიტანეთის პირველი უახლესი დიპლომატიური ნაბიჯია.

ლამის განცხადებით, "სტაბილური სირია ბრიტანეთის ინტერესშია", ხოლო "სირიელების პროგრესი შთამბეჭდავია — ადამიანებმა დაიწყეს ცხოვრების აღდგენა". მისი თქმით, გაერთიანებული სამეფო მხარს უჭერს ახალ ხელისუფლებას, რათა უზრუნველყოს მშვიდობიანი და წარმატებული მომავალი.

გარდა ამისა, ბრიტანეთის საგარეო ოფისმა £94.5 მილიონი გამოყო ჰუმანიტარული დახმარებისა და სირიის გრძელვადიანი აღდგენისთვის, მას შემდეგ რაც აპრილში რამდენიმე სანქცია მოიხსნა.

მიუხედავად იმისა, რომ HTS ტერორისტულ ორგანიზაციად ითვლება, შარშან კირ სტარმერმა განაცხადა, რომ შესაძლოა ის ამ სიიდან ამოიღონ.

სირიის პრეზიდენტის ადმინისტრაციამაც დაადასტურა, რომ ლამი და პრეზიდენტი ახლო აღმოსავლეთის საკითხებსა და თანამშრომლობას განიხილავდნენ.