აზერბაიჯანთან ურთიერთობის გამწვავების ფონზე, რუსეთი სომხეთში სამხედრო ძალას ზრდის. ამის შესახებ ინფორმაციას უკრაინის თავდაცვის სამინისტროს მთავარი სადაზვერვო სამმართველო ავრცელებს.

მათი თქმით, კრემლმა გიუმრიში საკუთარი სამხედრო ბაზის დაკომპლექტება დააჩქარა. გავრცელებულ ინფორმაციაში ასევე აღნიშნულია, რომ მიზანი სამხრეთ კავკასიის ქვეყნებზე სამხედრო-პოლიტიკური ზეწოლის გაძლიერებაა.

უკრაინის დაზვერვის ცნობით, პერსონალს რუსეთის შეიარაღებული ძალების იმ სამხედროთა შორის კრებენ, რომლებიც როსტოვის და ვოლგოგრადის ოლქებში, აგრეთვე დროებით ოკუპირებულ ყირიმში მსახურობენ.

გარდა ამისა, რუსეთი აქტიურად ეძებს მოხალისეებს კავკასიის დაპყრობილი ხალხების წარმომადგენლებს შორის — კერძოდ, ჩრდილოეთ ოსეთსა და ადიღეში.

უკრაინის თავდაცვის სამინისტროს დაზვერვის წარმომადგენელმა ანდრეი იუსოვმა ამ ფაქტთან დაკავშირებით განცხადება გააკეთა და თქვა, რომ სავარაუდოა რუსეთსა და აზერბაიჯანს შორის ურთიერთობების გაუარესება წინასწარ ყოფილიყო დაგეგმილი.

"რუსული ჯარების განთავსება სომხეთში არის კრემლის კომპლექსური სტრატეგიის ნაწილი, რომელიც მიზნად ისახავს გლობალური უსაფრთხოების დესტაბილიზაციას. ეთნოკონფლიქტების გაღვივებასთან ერთად, მოსკოვი ზრდის სამხედრო ყოფნას კავკასიაში. მოსალოდნელია, რომ აზერბაიჯანსა და რუსეთს შორის ურთიერთობების გაუარესება წინასწარ იყო დაგეგმილი", — თქვა ანდრეი იუსოვმა.

უკრაინის სადაზვერვო სამსახურის ამ განცხადებას სომხეთი პასუხობს და ამბობს, რომ არ შეიძლება მისი ტერიტორია მესამე ქვეყნებმა საომრად გამოიყენოს. უკრაინულ მხარეს სოციალური ქსელით სომხეთის საგარეო საქმეთა სამინისტროს პრესსპიკერი ანი ბადალიანი გამოეხმაურა.

"ზოგიერთ მედიასაშუალებაში გავრცელებული ყალბი ცნობების პასუხად, სომხეთის რესპუბლიკა კიდევ ერთხელ ადასტურებს თავის პრინციპულ პოზიციას — სომხეთის რესპუბლიკის ტერიტორია ვერ იქნება გამოყენებული მესამე ქვეყნების მიერ მეზობელი სახელმწიფოების წინააღმდეგ სამხედრო მოქმედებების განსახორციელებლად," — დაწერა ანი ბადალიანმა.

ოფიციალურ ბაქოსა და მოსკოვს ჯერჯერობით კომენტარები არ გაუკეთებიათ.

რუსეთსა და აზერბაიჯანს შორის ურთიერთობები მას შემდეგ გაუარესდა, რაც 27 ივნისს ეკატერინბურგში, რუსეთის ხელისუფლების ცნობით, 2000-იანი წლების დასაწყისში ჩადენილი მკვლელობებისთვის მასობრივად დააკავეს აზერბაიჯანული დიასპორის წარმომადგენლები.

ეკატერინბურგში რეიდის შემდეგ, აზერბაიჯანის ხელისუფლებამ გააუქმა სახელმწიფო და კერძო დაწესებულებების მიერ რუსეთიდან დაგეგმილი ყველა კულტურული ღონისძიება. აზერბაიჯანის საპარლამენტო დელეგაციამ გააუქმა მოსკოვში ვიზიტი რუს კანონმდებლებთან ერთობლივ სხდომაზე.

30 ივნისს, პოლიციამ ბაქოში რუსული საინფორმაციო სააგენტო "სპუტნიკ აზერბაიჯანის" ოფისში ჩხრეკა ჩაატარა. როგორც ადგილობრივი მედია აზერბაიჯანის შინაგან საქმეთა სამინისტროზე დაყრდნობით 1 ივლისს იტყობინებოდა, თაღლითობის, უკანონო მეწარმეობისა და ფულის გათეთრების საქმესთან დაკავშირებით შვიდი პირი დააკავეს, სააგენტოს ცნობით, ორი დააპატიმრეს, ხოლო ხუთი სისხლის სამართლის პასუხისგებაში მიეცა.