ავსტრიაში 2026 წლის ევროვიზიისთვის სამზადისი უკვე დაწყებულია. საიუბილეო, რიგით 70-ე ევროფესტივალზე მონაწილეობის სურვილი ამ დროისთვის თექვსმეტმა ქვეყანამ გამოთქვა; მათ შორის ერთ-ერთი ისრაელია, რომელმაც წლევანდელ კონკურსზე ტელემაყურებლისგან უმაღლესი შეფასებით მეორე ადგილი დაიკავა. თუმცა, მომავალი წლის ევროვიზიაზე ქვეყნის მონაწილეობის საკითხი ბოლომდე გადაწყვეტილი მაინც არაა.

ევროვიზიის სიმღერის კონკურსის ორგანიზატორმა ევროპის მაუწყებელთა კავშირმა (EBU) ცოტა ხნის წინ საერთო კრება გამართა ლონდონში. კრებაზე ერთ-ერთი მთავარი განსახილველი თემა სწორედ ისრაელის სამომავლო მონაწილეობის საკითხი იყო, რომელზე საუბარსაც თითქმის საათ-ნახევარი დაეთმო.

ისრაელური გამოცემა Ynet-ის ცნობით, შეკრებაზე საკითხის გადასაწყვეტად კენჭისყრა არ ჩატარებულა, რასაც ისრაელის საზოგადოებრივი მაუწყებელი "დროებით გამარჯვებად" ხედავს, რადგან გამოკითხვის შემთხვევაში, წევრების უმრავლესობა ქვეყნის კონკურსიდან მოხსნის მომხრე იქნებოდა. გამოცემა წერს, რომ განსაკუთრებულად ანტი-ისრაელური პოზიციით ისლანდია და სლოვენია გამოირჩეოდნენ, ებრაულ სახელმწიფოს კი მხოლოდ ავსტრიამ, გერმანიამ და შვეიცარიამ დაუჭირეს მხარი.

თუმცა, იმ EBU-ში მომუშავე წყაროს ცნობით, თუკი ისრაელის ომი ზამთრამდე გაგრძელდება, ამ საკითხზე კიდევ ერთი სადისკუსიო შეხვედრა გარდაუვალი იქნება, ისრაელის კონკურსზე მონაწილეობა კი სათუო გახდება, რადგან ამას ბევრი ქვეყანა ეწინააღმდეგება.

თავად EBU-ის გავრცელებულ განცხადებაში ვკითხულობთ, რომ კრებაზე წევრმა ქვეყნებმა მხარდაჭერა გამოუცხადეს ისრაელის საზოგადოებრივ მაუწყებელს, რომელიც "მთავრობისგან გამუდმებული ზეწოლის მიუხედავად, დამოუკიდებლობას ინარჩუნებს".

ევროვიზიის ფანების ნაწილი ისრაელის კონკურსიდან მოხსნას უკვე მეორე წელია, ითხოვს. ქვეყნის დისკვალიფიკაციის მომხრეა წლევანდელი გამარჯვებული, ავსტრიელი JJ, და ესპანეთის პრემიერმინისტრი პედრო სანჩესი. რამდენიმე თვის წინ, ევროვიზიის ყოფილი მონაწილეების ნაწილი მოთხოვნას ღია წერილითაც შეუერთდა.

ევროპის მაუწყებელთა კავშირი ევროვიზიიდან ისრაელის მოხსნის მოთხოვნებს აქამდეც არაერთხელ გამოხმაურებია. EBU-ის მტკიცებით, კონკურსი უნივერსალურ, აპოლიტიკურ და ინკლუზიურ შოუდ უნდა დარჩეს, რომელიც მუსიკით მრავალფეროვნებას ზეიმობს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...