ჩელიაბინსკის ოლქის საკანონმდებლო ასამბლეის თავმჯდომარის მოადგილე მმართველი პარტიიდან ედინაია როსია და ოქროს მომპოვებელი "იუჟურალზოლოტოს" მფლობელი კონსტანტინ სტრუკოვი ჩელიაბინსკიდან თურქეთში $50 მლნ-ზე მეტი ღირებულების პირადი ბიზნეს-ჯეტ Bombardier-ით გეგმავდა გაფრენას. ამის შესახებ "კომერსანტზე" დაყრდნობით DW წერს.

"როსავიაციამ" თვითმფრინავის აფრენას ხელი მას შემდეგ შეუშალა, რაც ის უკვე მზად იყო ასაფრენად. ბორტზე მანდატურებმა სტრუკოვს ჩამოართვეს საზღვარგარეთის პასპორტი, რომელიც იმ დროისთვის რუსეთის შინაგან საქმეთა სამინისტროს მიგრაციის სამსახურს უკვე ანულირებული ჰქონდა“, — იტყობინება "კომერსანტი"

ამასობაში, კომპანია "იუჟურალზოლოტომ" უარყო ინფორმაცია მისი ხელმძღვანელის დაპატიმრების შესახებ. კომპანიის განცხადებაში, რომელიც სააგენტო RBC-მ გამოაქვეყნა, ნათქვამია, რომ კონსტანტინ სტრუკოვს რუსეთიდან გაქცევა არ უცდია და ის არც დაუკავებიათ. კომპანიის წარმომადგენელმა განაცხადა, რომ 5 ივლისის დღის განმავლობაში სტრუკოვი სამუშაო ადგილზე, კომპანიის ოფისში იმყოფებოდა მოსკოვში. "მის წინააღმდეგ არანაირი საგამოძიებო ღონისძიება არ ჩატარებულა, ის არ დაუკავებიათ", — აცხადებს კომპანია.

DW წერს, რომ რუსეთის გენერალური პროკურატურა "იუზურალზოლოტოს" ნაციონალიზაციას მოითხოვს.

ორი დღით ადრე, რუსეთის გენერალურმა პროკურატურამ სასამართლოს მეშვეობით მოითხოვა ქვეყანაში ერთ-ერთი უდიდესი ოქროს მომპოვებელი კომპანიის, "იუჟურალზოლოტოს" ჰოლდინგის აქტივების სახელმწიფო საკუთრებაში გადაცემა, იტყობინება სააგენტო TASS დეპარტამენტის წყაროზე დაყრდნობით. სარჩელში ნათქვამია, რომ სტრუკოვმა, მთავრობაში თავისი თანამდებობის გამოყენებით, უკანონოდ მოიპოვა კონტროლი კომპანიამ "იუჟურალზოლოტოზე", რომელსაც ადრე ხელმძღვანელობდა და მის საფუძველზე შექმნა "იუგკი". ამ ეტაპზე აქტივი დეპუტატის ქალიშვილის, ალექსანდრა სტრუკოვას სახელზეა რეგისტრირებული, რომელიც შვეიცარიის მოქალაქეა.

ოქროს მომპოვებელი მესამე უდიდესი კომპანია

იუჟურალზოლოტო ოქროს მოპოვების მხრივ რუსეთში მესამე ადგილზეა. კომპანიის აქტივები მოიცავს ჩელიაბინსკის რეგიონში, ხაკასიასა და კრასნოიარსკის მხარეში არსებულ საბადოებს. გასულ წელს მან 10,6 ტონა ოქრო მოიპოვა, რითაც 25 მლრდ რუბლი გამოიმუშავა. ამავდროულად, წმინდა ზარალმა 7.2 მილიარდი რუბლი შეადგინა.

თავად სტრუკოვი ჟურნალ Forbes-ის რეიტინგში 78-ე ადგილზეა 1.9 მილიარდი დოლარის ქონებით.

ნაციონალიზაცია უკრაინასთან ომის ფონზე

რუსეთის ხელისუფლებამ კერძო აქტივების ჩამორთმევა მას შემდეგ დაიწყო, რაც რუსეთმა უკრაინის წინააღმდეგ აგრესიული ომი დაიწყო სანქციებისა და ბიუჯეტის დეფიციტის ფონზე. მარტის შუა რიცხვებში გენერალურმა პროკურორმა იგორ კრასნოვმა 2.4 ტრილიონი რუბლის ღირებულების კომპანიების ნაციონალიზაციის შესახებ განაცხადა და აღნიშნა, რომ სიაში ასევე შედიოდა „ხუთი სტრატეგიული საწარმო“.

2024 წელს, The Moscow Times-ის გათვლებით, რუსეთის ფედერაციაში ნაციონალიზაციის მოცულობამ პიკს მიაღწია. მისი შეფასებით, სახელმწიფომ თითქმის შვიდი ათეული კომპანია შეიძინა, რომელთა საერთო შემოსავალი 807.6 მილიარდ რუბლზე მეტი იყო, ხოლო აქტივების ღირებულება 544.7 მილიარდ რუბლზე მეტი.