უზენაესი სასამართლოს მოსამართლეობის კანდიდატი, რევაზ ნადარაია სასამართლო სისტემის შიგნით შესაცვლელს ბევრს ვერაფერს ვერ ხედავს. ქართული ოცნების დეპუტატის, დავით მათიკაშვილის კითხვას, თუ რას შეცვლიდა სასამართლო სისტემაში, ნადარაიამ სწორედ ასე უპასუხა.

"სასამართლო სისტემის შეცვლაზე გეტყვით ერთ რამეს, ზოგადად, გამოწვევებს უფრო უკავშირდება, ხო, ეს შეკითხვა თავის შინაარსით? პირველ რიგში, ვიტყვი იმას, რომ სასამართლო სისტემა სწორი გზით ვითარდება. ის, რომ განვითარება გვჭირდება, შეიძლება გარკვეული ტიპის რეფორმები, ეს მუდმივი პროცესია და განვითარება ყოველთვის, ნებისმიერ ეტაპზე სასამართლო სისტემას სჭირდება. მე გამოწვევების კუთხით უფრო ვუპასუხებდი ამას და გამოწვევა ყველამ იცის, თუ მივდივარ სწორად და თუ ამას გულისხმობდით, გამოწვევა, იდენტიფიცირებული პრობლემა არის სასამართლო სისტემისთვის გადაჭარბებული საქმეები ყველა ინსტანციაში, აქედან გამომდინარე, ყველა ვთანხმდებით, რომ ეს გამოწვევა არის დასაძლევი. სასამართლო სისტემის შიგნით შესაცვლელს მე ბევრს ვერაფერს ვერ ვხედავ, მაგრამ სასამართლო სისტემისადმი მიდგომა და დამოკიდებულება რომ შესაცვლელია, ამას ნამდვილად ვხედავ", — განაცხადა ნადარაიამ იურიდიულ საკითხთა კომიტეტის სხდომაზე. 4

მისივე თქმით, არათუ სასამართლო სისტემა, არამედ სასამართლოსადმი დამოკიდებულებაა შესაცვლელი.

"ზოგადად, ისმის სასამართლო სისტემის ნდობის კუთხით პრობლემა, პრობლემის საკითხი. მე ვფიქრობ, რომ სასამართლო სისტემას საკმაოდ ნდობა აქვს. მე არ ვამბობ, რომ ეს ბოლო წერტილია, ეს ყოველთვის უნდა განვითარდეს, მაგრამ საკმაოდ ნდობა აქვს სასამართლო სისტემას, უბრალოდ, საქართველოში პრობლემა არის სასამართლო სისტემის ნდობისათვის ხელოვნური და მიზანმიმართული პრობლემების შექმნა, სასამართლო სისტემის მიზანმიმართული დისკრედიტაცია", — ამტკიცებს ნადარაია.

უზენაესი მოსამართლეობის კანდიდატების პარლამენტში მესამე დღეა უსმენენ. განხილვებში მონაწილეობას არ იღებს საპარლამენტო ოპოზიციის დიდი ნაწილი. კანდიდატთა მოსმენაზე უარი თქვა სახალხო დამცველმაც. ნინო ლომჯარიამ ამ გადაწყვეტილების მიზეზად სწორედ სასამართლო სისტემაში არსებული გავლენიანი ჯგუფის ერთპიროვნული მმართველობა დაასახელა.

გაიგე მეტი: