25 თებერვალს ევროპარლამენტმა კენჭისყრის შედეგად მხარი დაუჭირა საუდის არაბეთისთვის იარაღის მიყიდვაზე ემბარგოს დაწესებას. გადაწყვეტილებას იურიდიული ძალა არ აქვს, მაგრამ ევროპელი კანონმდებლები იმედოვნებენ, რომ ევროკავშირის მთავრობები გაითვალისწინებენ ამ ფაქტს და შესაბამისად იმოქმედებენ.

ევროპარლამენტის წევრების აზრით, ბრიტანეთმა, საფრანგეთმა და ევროკავშირის სხვა წევრმა ქვეყნებმა საუდის არაბეთს იარაღი აღარ უნდა მიჰყიდონ, რადგან ქვეყანა მუდმივად ესხმის თავს იემენის მშვიდობიან მოსახლეობას.

არაბული კოალიცია, რომლის შემადგენლობაშიც ცხრა ქვეყანა, ეგვიპტე, საუდის არაბეთი, მაროკო, იორდანია, სუდანი, არაბთა გაერთიანებული საემიროები, ბაჰრეინი, ყატარი და კუვეიტი შედის, იემენის სამოქალ

აქო ომში ქვეყნის დეიურე ლიდერის აბდ რაბუ მანსურ ჰადის თხოვნის საფუძველზე ჩაერთო და მის ოპოზიციაზე მუდმივ საჰაერო შეტევებს ახორციელებს.

არაბული კოალიციის თავდასხმების შედეგად, 2015 წლის მარტის შემდეგ იემენში 6 ათასი ადამიანი დაიღუპა, აქედან თითქმის ნახევარი მშვიდობიანი მოქალაქე იყო.

კენჭისყრის ინიციატორი პარლამენტატი რიჩარდ ჰოვიტის თქმით, ევროკავშირში საუდის არაბეთის მუდმივი წარმომადგენელი დაიმუქრა, რომ ემბარგოს დაწესების შემთხვევაში ქვეყანა ევროპასთან ურთიერთობას შეწყვეტს.

ელჩმა აბდულრაჰმან ალ აჰმედმა ევროპარლამენტარებს წერილით მიმართა, რომელშიც საუდის არაბეთისა და კოალიციის ქმედებები დაიცვა:

"რომ არა ჩვენი ჩარევა იემენის კონფლიქტში, ჩვენ მივიღებდით გეოპოლიტიკურ კრიზისს, რომელიც დააზარალებდა როგორც საუდის არაბეთს, ასევე მთელს რეგიონსა და ევროპას."

გაეროს მონაცემებით იემენში ჰუმანიტარული კატასტროფაა. 14.4 მილიონი ადამიანი შიმშილობს, ამავე დროს ხშირია თავდასხმები საავადმყოფოებსა და სამედიცინო დაწესებულებებზე.

ევროპარლამენტის რეკომენდაციას ზურგს უმაგრებს ევროკავშირის 750 ათასი მოქალაქის მიერ ხელმოწერილი პეტიცია.